Lögreglan á höfuðborgarsvæðinu leitar vitna í tengslum við rannsókn á innbroti í Reykjabúið á Suður-Reykjum í Mosfellsbæ aðfaranótt mánudagsins 1. júní. Brotist var inn í hænsnabú Reykjabúsins á 4. tímanum um nóttina samkvæmt upplýsingum frá lögreglu.
Svartklæddur maður kom gangandi að vettvangi
Að sögn lögreglu var innbrotsþjófurinn svartklæddur og kom gangandi að Reykjabúinu frá Bjargsvegi. Ekki er þó talið ósennilegt að maðurinn hafi komið akandi á svæðið og lagt bifreið sinni fjarri vettvangi áður en hann hélt fótgangandi að Reykjabúinu. Lögregla telur einnig mögulegt að viðkomandi hafi komið neðan úr Skammdal, frá Helgafellshverfi, Reykjahverfi eða af Hafravatnsvegi.
Óskað eftir myndefni úr ökutækjum og öryggismyndavélum
Lögreglan bendir á að mörg ökutæki séu búin myndavélum og því gæti myndefni frá umræddum tíma verið til staðar hjá einstaklingum sem áttu leið um svæðið. Þá er einnig óskað eftir því að eigendur öryggismyndavéla á svæðinu fari yfir myndefni sitt vegna málsins.
Þeir sem kunna að hafa upplýsingar eða myndefni undir höndum eru beðnir um að senda upplýsingar á netfangið [email protected] ásamt nafni og símanúmeri. Einnig er hægt að hafa samband við lögreglu í síma 444 1000.