Matís hefur hafið arfgerðagreiningar á sauðfé til að meta þol þess gegn riðu samkvæmt samningi við Ráðgjafarmiðstöð landbúnaðarins. Gert er ráð fyrir að um 70–80 þúsund sýni verði greind á næstu árum. Erfðahópur Matís hefur um árabil sinnt arfgerðagreiningum á búfé, meðal annars vegna erfða sem hafa áhrif á frjósemi, erfðagalla og við faðernisgreiningar. Verkefnið vegna riðu er hins vegar mun umfangsmeira en fyrri greiningar.
DNA raðgreint og niðurstöður skráðar í Fjárvís
Greiningarnar byggja á DNA-raðgreiningu. Fyrst er DNA einangrað úr lífsýnum og tiltekið svæði PRNP-gensins magnað með PCR-aðferð. Svæðið er síðan raðgreint og sérfræðingar Matís fara yfir niðurstöðurnar og staðfesta gæði gagnanna.
Niðurstöðurnar eru því næst sendar til Ráðgjafarmiðstöðvar landbúnaðarins þar sem þær eru skráðar í Fjárvís.
Markmiðið er að greina arfgerðir sauðfjár sem tengjast þoli gegn riðu og styðja þannig við ræktunarstarf og baráttuna gegn sjúkdómnum.
Fleiri eiginleikar sauðfjár greindir
Matís býður samhliða upp á fleiri arfgerðagreiningar fyrir sauðfjárrækt. Þar á meðal eru greiningar vegna bógkreppu og frjósemisbreytileikanna Lóu og Þoku.
Aukið umfang starfseminnar hefur jafnframt gert reksturinn hagkvæmari og leitt til hagstæðara verðs á greiningunum en áður.
Með verkefninu eykst umfang erfðagreininga Matís fyrir íslenskan landbúnað verulega og er þjónustunni ætlað að styðja bæði við ræktunarstarf íslensks sauðfjár og aðgerðir gegn riðu.