Hjördís Vilhjálmsdóttir ræddi við Kristínu Sigurðardóttur, slysa- og bráðalækni og Sigríði Kristjánsdóttur, skipulagsfræðing í síðdegisútvarpinu um viðbrögðin sem þær fengu þegar þær gagnrýndu opinber skipulagsmál. Kristín sagði yfirmann sinn hafa tilkynnt sér að hún mætti ekki tala gegn opinberri stefnu Landspítala eftir að hún gagnrýndi staðsetningu og hönnun nýs spítala við Hringbraut. Í kjölfarið hefði hún hætt að fá boð á fundi nefndar sem hún sat í. Hlusta má á þáttinn í spilaranum hér að neðan.
Gagnrýndi ákvörðun frá árinu 1969
Kristín sagði mikilvægt að fagfólk tjáði sig þegar það sæi að betur mætti fara. Hún hefði litið svo á að almenningur sem greiddi skatta væri í raun vinnuveitandi hennar og að henni bæri að miðla þekkingu sinni til þjóðarinnar.
Eftir heimkomu úr sérnámi kynnti hún sér fyrirætlanir um áframhaldandi uppbyggingu Landspítala við Hringbraut. Ákvörðunin byggðist á stefnu sem rekja mætti aftur til ársins 1969 en síðan þá hefðu Reykjavík, samgöngur og kröfur til sjúkrahúsa breyst verulega.
Kristín sagði að aðrir staðir hefðu verið skoðaðir og Vífilsstaðir hefðu komið best út úr þeirri vinnu. Þar hefði verið meira rými, betri tenging við náttúruna og möguleikar á greiðari samgöngum.
Hún tók þátt í starfi samtakanna Betri spítali á betri stað, þar sem bent var á veikleika fyrirhugaðrar uppbyggingar. Meðal annars hefðu verið gerðar athugasemdir við staðsetningu þyrlupalls og hvort stórar björgunarþyrlur gætu notað hann. Kristín lagði áherslu á að þessar athugasemdir hefðu verið settar fram áður en framkvæmdir voru komnar langt.
Fékk skammir fyrir opinbera gagnrýni
Aðspurð hvort hún hefði fundið fyrir þrýstingi vegna afstöðu sinnar sagði Kristín svo hafa verið. Hún hefði tjáð sig opinberlega og fengið skammir fyrir.
Yfirmaður hennar hefði kallað hana á fund og sagt að málið kæmi að ofan. Hann hefði sjálfur fengið skammir vegna þess hvernig hún tjáði sig og gert henni ljóst að hún mætti ekki tala gegn opinberri stefnu spítalans.
Kristín sat jafnframt í nefnd sem vann að endurskipulagningu slysa- og bráðadeildar. Hún hafði sérmenntun og starfsreynslu frá nýjum bráðadeildum og háskólasjúkrahúsum í Bretlandi. Eftir að hún gagnrýndi spítalaframkvæmdirnar var hins vegar hætt að boða hana á fundi nefndarinnar.
Ekki boðið aftur eftir gagnrýni
Sigríður lýsti sambærilegri reynslu eftir að hún kom fram í morgunútvarpi RÚV fyrir meira en 10 árum og gagnrýndi aðalskipulag Reykjavíkur. Hún gerði meðal annars athugasemdir við umfang skipulagsins, ósamræmi milli prentaðrar útgáfu og netútgáfu og vaxtarmörk við Elliðaár.
Hún varaði við því að vaxtarmörkin myndu hækka fasteignaverð innan þeirra. Eftir viðtalið hefði síminn ekki hætt að hringja og henni verið sagt að hún hefði gert rangt með því að setja gagnrýnina fram. Sigríður sagði RÚV ekki hafa boðið sér aftur í viðtal á þeim rúma áratug sem liðinn væri.
Báðar lögðu áherslu á að fagleg gagnrýni ætti að nýtast til að bæta ákvarðanir. Ef sérfræðingar gætu ekki bent á vandamál og rætt lausnir væri hætt við að mikilvæg þekking nýttist ekki við opinbera stefnumótun.
Hlusta má á ítarlegri umfjöllun í spilaranum hér að neðan.