Arnþrúður Karlsdóttir ræddi við Guðrúnu Hafsteinsdóttur, formann Sjálfstæðisflokksins í síðdegisútvarpinu um áhrif mögulegrar aðildar Íslands að Evrópusambandinu á landbúnað og matvælaframleiðslu. Guðrún sagði að íslenskur landbúnaður stæði frammi fyrir allt öðrum aðstæðum en víða annars staðar í Evrópu og breytingar á tollavernd og markaðsaðgengi gætu haft veruleg áhrif á innlenda framleiðslu. Jafnframt sagði hún að matvælaöryggi væri mikilvægur þáttur í þjóðaröryggi landsins. Hlusta má á þáttinn í spilaranum hér að neðan.
Ólíkar aðstæður bænda á Íslandi og í Evrópu
Íslenskur landbúnaður býr við aðstæður sem eru frábrugðnar því sem gerist í mörgum ríkjum Evrópusambandsins. Loftslagið er kaldara, vaxtartími plantna styttri og framleiðsluskilyrði erfiðari en víða sunnar í álfunni. Þessi sérstaða hefur áhrif á framleiðslukostnað og samkeppnisstöðu íslenskra bænda. Guðrún sagði að samanburður við framleiðslu í ríkjum þar sem ræktun fer fram við mun hagstæðari náttúruskilyrði gæfi ekki rétta mynd af stöðu íslensks landbúnaðar. Bændur hér á landi þyrftu að takast á við aðrar áskoranir en kollegar þeirra víða í Evrópu og því væri erfitt að gera ráð fyrir að samkeppnisstaðan yrði óbreytt við afnám verndar sem nú er til staðar.
Samkeppnisumhverfi gæti raskað rekstrargrundvelli margra búgreina
Guðrún sagðist hafa áhyggjur af því að aukin samkeppni frá erlendum framleiðendum gæti haft áhrif á rekstrargrundvöll margra búgreina hér á landi. Hún nefndi bæði kjötframleiðslu og önnur matvælaframleiðslu sem byggja á sérstökum aðstæðum sem íslenskur landbúnaður starfi við.
Framleiðendur í stærri ríkjum Evrópu hefðu hins vegar aðgang að mun stærri mörkuðum og nytu oft annarra framleiðsluskilyrða en íslenskir bændur. Afleiðingin gæti orðið sú að innlend framleiðsla ætti erfiðara með að standa undir samkeppni ef verulegar breytingar yrðu á tollakerfi og markaðsaðgangi sagði Guðrún
Matvælaöryggi er hluti af þjóðaröryggi
Þá lagði Guðrún áherslu á að matvælaöryggi væri ekki aðeins efnahagslegt mál heldur einnig öryggismál. Ísland væri eyþjóð langt frá helstu mörkuðum og því skipti máli að landið héldi getu til að framleiða hluta af eigin matvælum.
Undanfarin ár hafi alþjóðlegar krísur, stríðsátök og truflanir í flutningakerfum varpað ljósi á mikilvægi þess að ríki geti reitt sig á eigin framleiðslu að einhverju marki. því væri varasamt að taka ákvarðanir sem gætu dregið úr innlendri matvælaframleiðslu eða aukið enn frekar háð landsins á innflutt matvæli sagði Guðrún.
Hlusta má á ítarlegri umfjöllun í spilaranum hér að neðan.