Miðflokkurinn í Kópavogi hefur birt stefnuskrá sína og helstu áherslur fyrir komandi kosningar. Flokkurinn opnunaði jafnframt kosningaskrifstofu í dag þar sem frambjóðendur kynntu stefnumálin. Oddviti listans er Einar Jóhannes Guðnason. Í öðru sæti er Nína Berglind Sigurgeirsdóttir og í þriðja sæti Beitir Ólafsson.
Vilja breyta stefnu í skipulagsmálum
Í stefnuskránni kemur fram að Miðflokkurinn vilji stöðva þá þróun sem hann kallar „Reykjavíkurvæðingu“ Kópavogs og færa aukna skynsemi inn í skipulagsmál. Flokkurinn gagnrýnir það sem hann telur vera óhóflega þéttingarstefnu og vill hverfa frá henni. Þá er lögð áhersla á að samgönguúrbætur taki mið af öllum ferðamátum. Flokkurinn hafnar Borgarlínu og vill að endurskoðunarákvæði samgöngusáttmála verði virkjað.
Áhersla á menntamál og árangur
Miðflokkurinn leggur sérstaka áherslu á menntamál og vill auka stuðning við nemendur með það að markmiði að hver og einn fái kennslu við hæfi. Flokkurinn vill taka upp samræmd próf á ný og að einkunnir verði gefnar í tölustöfum. Einnig er lagt til að dregið verði úr notkun spjaldtölva í skólum og að enginn áróður fari fram innan þeirra.
Fjölskyldur og eldri borgarar í forgrunni
Í fjölskyldumálum vill flokkurinn hækka heimgreiðslur í 250 þúsund krónur á mánuði. Þá er lagt til að eldri borgarar fái sérstakan frístundastyrk. Flokkurinn leggur jafnframt áherslu á betri nýtingu skattfjár með því að beina fjármunum frekar í grunnþjónustu en verkefni sem hann telur minna brýn.
Samgöngur, íþróttir og menning
Meðal annarra áherslumála er að frítt verði í almenningssamgöngur í tvö ár í tilraunaskyni og að tvö bílastæði fylgi hverri íbúð. Þá vill flokkurinn kanna möguleika á 18 holu golfvelli í nágrenni Guðmundarlundar sem gæti einnig nýst sem gönguskíðasvæði á veturna.
Einnig er lagt til að opnunartími sundlauga verði lengdur um helgar og að fjárfestingar í íþróttamannvirkjum verði forgangsraðað í samstarfi við íþróttafélög. Á sviði menningar vill flokkurinn efla bæjarlíf með árlegri bæjarhátíð, jólamörkuðum og endurvekja áramótabrennu.