Arnþrúður Karlsdóttir ræddi við Tómas Brynjólfsson, varaseðlabankastjóra í síðdegisútvarpinu í dag, um stöðu ríkisfjármála, skuldir ríkissjóðs og hlutverk hins opinbera í efnahagsstjórn landsins. Tómas sagði að eitt mikilvægasta verkefni ríkisfjármálanna á komandi árum væri að draga úr skuldum ríkissjóðs þannig að stjórnvöld hefðu meira svigrúm til að bregðast við, þegar áföll dynja yfir samfélagið. Hlusta má á þáttinn í spilaranum hér að neðan.
Ísland verði reglulega fyrir óvæntum áföllum
Í umræðunni vísaði Arnþrúður meðal annars til fjármálaáætlunar ríkisstjórnarinnar frá apríl s.l., og því haldið fram um að skuldirnar mætti rekja til faraldursáranna. Tómas sagði að þegar litið væri yfir síðustu 15 ár sæist skýrt að íslenskt hagkerfi yrði reglulega fyrir áföllum af ólíkum toga.
Hann nefndi bæði alþjóðlegar efnahagssveiflur, náttúruhamfarir og aðra ófyrirsjáanlega atburði sem gætu kallað á umfangsmikil viðbrögð ríkisins. Af þeim sökum væri mikilvægt að ríkissjóður byggði upp fjárhagslegt bolmagn á góðum tímum svo hægt væri að styðja við hagkerfið þegar erfiðleikar kæmu upp.
Sterkari ríkisfjármál skapa meira svigrúm
Tómas sagði að lægri skuldir væru ekki markmið í sjálfu sér, heldur leið til að auka getu ríkisins til að takast á við framtíðaráskoranir. Ríkið þyrfti að hafa svigrúm til að bregðast við þegar atvinnuleysi eykst, efnahagsleg áföll yrðu eða þegar samfélagið stæði frammi fyrir óvæntum kostnaði.
Hann benti jafnframt á að umgjörð ríkisfjármála hefði tekið verulegum breytingum á síðustu árum. Með nýjum lögum og breyttum reglum væri meira aðhald í ríkisrekstri en áður og markmiðið að styrkja stöðu hins opinbera til lengri tíma.
Verðbólgan áfram stærsta verkefnið
Þótt umræðan snerist að hluta að ríkisfjármálum lagði Tómas áherslu á að stærsta efnahagsmálið um þessar mundir væri verðbólgan. Að hans mati skiptu aðgerðir Seðlabankans þar mestu máli, enda bæri bankinn ábyrgð á að halda verðbólgu í skefjum og stuðla að stöðugleika í hagkerfinu.
Hann taldi að ábyrg ríkisfjármál og lækkun skulda gætu stutt við þann stöðugleika, en undirstrikaði jafnframt að meginverkefni Seðlabankans væri að tryggja að verðbólga færi aftur niður í markmið bankans.
Hlusta má á ítarlegri umfjöllun í spilaranum hér að neðan.