Ný kynslóð matreiðslumanna tekur við fjölskylduhefðinni

Arnþrúður Karlsdóttir ræddi við Ragnar Guðmundsson, matreiðslumeistara og fyrrum veitingamann í Laugaás og Eirík Inga Friðgeirsson, matreiðslumeistara í Jólaþættinum á Útvarpi Sögu, um kynslóðaskipti í veitingarekstri og þróun íslenskrar matargerðar. Synir þeirra, Guðmundur og Friðgeir Ingi, hafa tekið við rekstri veitingastaða í Perlunni, Eiríksdóttur í Grósku og á Eiríksson Brasserie,Laugavegi 77 þar sem reynsla eldri kynslóðarinnar nýtist samhliða nýjum hugmyndum og alþjóðlegum straumum í matargerð. Hlusta má á þáttinn í spilaranum hér að neðan.

Synirnir halda fjölskylduhefðinni áfram

Ragnar og Eiríkur hafa báðir starfað við matreiðslu og veitingarekstur áratugum saman. Nú hafa synir þeirra tekið við stærri hluta starfseminnar og byggt upp rekstur á þremur stöðum í Reykjavík.

Guðmundur, sonur Ragnars, og Friðgeir Ingi, sonur Eiríks, koma að veitingarekstrinum í Grósku og Perlunni en Friðgeir Ingi rekur jafnframt Eiríksson Brasserie við Laugaveg 77 ásamt systkinum sínum.

Ragnar sagði gömlu uppskriftirnar og vinnubrögðin enn lifa í eldhúsunum þótt yngri matreiðslumennirnir hefðu komið með nýjar hugmyndir og fjölbreyttari matseðla.

Reynsla úr Michelin-eldhúsi nýtt í Reykjavík

Friðgeir Ingi öðlaðist mikilvæga reynslu í Frakklandi eftir að hafa lokið matreiðslunámi. Þar starfaði hann í 6 ár á Michelin-veitingastað sem Philippe Gérard Thomsen rak og gegndi stöðu yfirkokks síðustu árin.

Eiríkur sagði það hafa verið sérstakan árangur fyrir ungan íslenskan matreiðslumann að fá slíka ábyrgð í frönsku eldhúsi.

Þegar Friðgeir tók við veitingarekstri á Hótel Holti árið 2007 nýtti hann reynsluna til að endurnýja matseðilinn. Síðar kom hann að uppbyggingu Eiríkssonar Brasserie á Laugavegi 77, þar sem lögð var áhersla á að skapa veitingastað með sérstakt yfirbragð.

Til þess var fengin ítölsk hönnunarstofa í Mílanó sem sá um innréttingar og hönnun staðarins.

Frá dósagrænmeti til fjölbreyttrar nútímamatargerðar

Matreiðslumeistararnir hafa upplifað miklar breytingar á hráefnisframboði frá því þeir hófu störf.

Eiríkur rifjaði upp að á námsárum þeirra hefði grænmetisúrvalið að mestu byggst á dósavörum. Um 1980 hefði frosið grænmeti orðið algengara og síðar ferskt grænmeti í sífellt meira úrvali.

Ragnar sagði nýja kynslóð matreiðslumanna hafa mun fjölbreyttara hráefni til að vinna með en áður. Það hefði skapað aukið svigrúm til nýsköpunar án þess að hefðbundin íslensk matargerð hyrfi.

Eldri kynslóðin starfar áfram með sonunum

Arnþrúður ræddi hvernig matreiðslumeistararnir héldu áfram að taka þátt í veitingarekstrinum þótt synir þeirra hefðu tekið við daglegri ábyrgð.

Eiríkur sagði það mikil forréttindi að fá að starfa með sonunum á þessum tíma ævinnar. Þeir gætu miðlað reynslu sinni, aðstoðað við reksturinn og tekið á móti gestum í stað þess að hætta alfarið störfum.

Ragnar tók undir þetta og sagði þá gegna hlutverki sendiherra veitingastaðanna. Þeir mættu meðal annars sjálfir til að taka á móti gestum þegar boðið væri upp á skötu á Þorláksmessu.

Arnþrúður fagnaði því að þeir héldu áfram að miðla þekkingu sinni og reynslu til yngri kynslóðarinnar. Þannig lifðu gömlu matarhefðirnar áfram samhliða þeirri þróun sem synir þeirra leiddu í veitingarekstrinum.

Hlusta má á ítarlegri umfjöllun í spilaranum hér að neðan.

Deila þessari frétt á samfélagsmiðla

Deila