Umhverfis-, orku- og loftslagsráðuneytið hefur birt drög að nýrri þingsályktun um stefnu stjórnvalda um uppbyggingu flutningskerfis raforku í Samráðsgátt stjórnvalda. Stefnunni er ætlað að taka við af gildandi stefnu sem samþykkt var á Alþingi og leggja nýjar áherslur um þróun eins mikilvægasta innviðs landsins.
Áhersla á aukið afhendingaröryggi
Samkvæmt drögunum er meginmarkmiðið að efla flutningsgetu raforku milli landshluta, bæta afhendingargetu og auka afhendingaröryggi um allt land. Sérstök áhersla er lögð á Vestfirði og Norðausturland þar sem þörf er talin á frekari styrkingu kerfisins.
Jafnframt er lögð áhersla á að samhæfa betur uppbyggingu orkuvinnslu, flutningskerfis og raforkunotkunar til að mæta framtíðarþörfum samfélagsins.
Flutningskerfið áfram í opinberri eigu
Í drögunum er áréttað að flutningskerfi raforku skuli áfram byggt upp og rekið af flutningsfyrirtæki í opinberri eigu.
Þá eru sett fram viðmið um lagningu raflína þar sem tekið er tillit til umhverfis-, skipulags- og öryggissjónarmiða þegar ákvarðanir eru teknar um uppbyggingu kerfisins.
Segja hraða uppbyggingu lykilforsendu
Í stefnudrögunum kemur fram að hraðari uppbygging flutningskerfisins sé talin forsenda þess að hægt verði að auka orkuöflun, styðja við orkuskipti og skapa aukin verðmæti í atvinnulífi um land allt.
Ráðuneytið bendir á að stefna stjórnvalda sé leiðbeinandi fyrir flutningsfyrirtækið og skilgreini markmið, forgangsröðun og þau sjónarmið sem leggja skuli til grundvallar þegar ólíkir hagsmunir rekast á.
Umsagnarfrestur til 19. ágúst
Drögin hafa verið birt í Samráðsgátt stjórnvalda og gefst almenningi og hagsmunaaðilum kostur á að senda inn umsagnir til og með 19. ágúst.
Smelltu hér til þess að skoða málið í samráðsgátt.