Arnþrúður Karlsdóttir ræddi við Atla Lillendahl, framkvæmdastjóra sem búsettur var í 30 ár á Grænlandi í síðdegisútvarpinu um hvernig nýir alþjóðaflugvellir á Grænlandi og bættar samgöngur gætu gjörbreytt viðskiptum og samstarfi milli Íslands og Grænlands. Hann sagði breytingarnar skapa ný tækifæri fyrir útflutning, ferðaþjónustu og aukin efnahagsleg tengsl milli landanna. Hlusta má á þáttinn í spilaranum hér að neðan.
Keflavík yrði mikilvæg tengimiðstöð
Atli sagði að opnun nýrra alþjóðaflugvalla, meðal annars í Qaqortoq á Suður-Grænlandi, markaði tímamót í samgöngum landsins. Að hans mati myndi Keflavíkurflugvöllur gegna lykilhlutverki sem tengimiðstöð fyrir Grænlendinga á leið til Norður-Ameríku og annarra áfangastaða.
Hann sagði að flugtengingar milli Íslands og Grænlands hefðu þegar aukist og þær gætu skapað bæði íslenskum og grænlenskum fyrirtækjum ný sóknarfæri. Jafnframt taldi hann að nýju flugvellirnir myndu auðvelda útflutning á ferskum sjávarafurðum og öðrum verðmætum afurðum frá Grænlandi.
Viðskipti færist nær Íslandi
Atli sagði að Grænlendingar hefðu lengi þurft að treysta á Danmörku sem helstu samgönguleið fyrir vörur til og frá landinu. Hann gagnrýndi jafnframt að einokun hefði ríkt um langan tíma í vöruflutningum til Grænlands og að það hefði tafið þróun nýrra viðskiptaleiða.
Að hans mati gætu auknar flug- og siglingatengingar við Ísland breytt þessari stöðu. Hann sagði jafnframt að grænlenskir stjórnmálamenn hefðu um árabil sýnt áhuga á fríverslunarsamningi við Ísland og Noreg, enda gæti slíkt samstarf styrkt efnahag Grænlands og aukið sjálfstæði landsins í alþjóðaviðskiptum.
Aukið samstarf þjónar hagsmunum beggja landa
Atli taldi að bæði Ísland og Grænland hefðu mikilla hagsmuna að gæta af nánara samstarfi. Hann sagði bættar samgöngur skapa forsendur fyrir auknum viðskiptum, betri útflutningsleiðum og nánari tengslum milli ríkjanna.
Að hans mati mun mikilvægi Íslands í samgöngum og viðskiptum við Grænland aukast eftir því sem Grænlendingar byggja upp sjálfstæðari innviði og leitast við að eiga beinari samskipti við nágrannaríki sín.
Hlusta má á ítarlegri umfjöllun í spilaranum hér að neðan.