Kristján Örn Elíasson ræddi við Dr. Oddgeir Ágúst Ottesen, formann Skákdeildar KR, í þættinum Við skákborðið um uppbyggingu barna- og unglingastarfs hjá félaginu. Þar kom fram að starfsemin hefði vaxið hratt undanfarin ár og þátttaka barna væri mikil og félagið stefndi að frekari eflingu mótahalds og þjálfunar á næstu árum. Hlusta má á þáttinn í spilaranum hér að neðan.
Uppbygging frá árinu 2022
Oddgeir sagði að Skákdeild KR hefði verið með samfellda barna- og unglingastarfsemi frá mars árið 2022 og félagið væri nú komið með öflugan hóp ungra iðkenda. Flest börnin væru á aldrinum 6 til 10 ára, en einnig væru yngri börn í starfinu þar sem foreldrar fylgdu þeim á æfingar. Fram kom að skákæfingar væru nú haldnar bæði í KR-heimilinu og í samfélagshúsinu á Aflagranda. Aðstaðan hefði reynst góð, en með nýrri byggingu við KR-heimilið opnuðust enn frekari möguleikar fyrir félagið til mótahalds og stærri viðburða.
Starfsemin byggðist þannig ekki eingöngu á því að undirbúa börn fyrir næsta mót heldur væri lögð áhersla á langtímaþjálfun. Félagið notaði sérstakt kennsluefni í skákkennslu, en hann lagði þó áherslu á að gæði þjálfaranna skiptu mestu máli. Markmiðið væri að efla reikningsgetu, hugsun fram í tímann og almennan skilning á skákinni yfir lengri tíma.
Alþjóðlegt umhverfi í skákstarfinu
Í viðtalinu kom einnig fram að fjölbreyttur hópur barna sækti æfingar hjá KR. Þar væru meðal annars börn af indverskum, úkraínskum og rússneskum uppruna auk barna með annað foreldri erlendis frá. Oddgeir sagði skák njóta mikilla vinsælda meðal indverskra fjölskyldna og að börn þaðan héldust gjarnan lengi í starfinu.
Þjálfarar frá Úkraínu hefðu einnig komið að kennslu hjá félaginu og hluti kennslunnar færi fram á ensku. Að sögn Oddgeirs væri þetta hluti af þeirri þróun sem sæist víðar á höfuðborgarsvæðinu þar sem fleiri skákfélög væru að byggja upp öflugt barna- og unglingastarf.
Skákmót og félagsstarf
KR hefur undanfarna mánuði staðið fyrir reglulegum atskákmótum fyrir börn og unglinga. Þar hafa margir ungir keppendur náð sínum fyrstu alþjóðlegu skákstigum. Oddgeir sagði það hafa reynst mikil hvatning fyrir börnin að komast á alþjóðlega stigaskrá Alþjóðaskáksambandsins.
Félagið hefur einnig lagt áherslu á félagslegt umhverfi í kringum æfingar og mót. Boðið hefur verið upp á hlé með djúsi og kexi fyrir yngstu börnin og foreldrar hafa haft góða aðstöðu til að fylgjast með æfingum. Þá hefur verið boðið upp á pizzukvöld í tengslum við sum mót til að auðvelda skipulag og tryggja að mótin geti hafist á réttum tíma.
Oddgeir sagði að uppgangur væri nú í barna- og unglingaskák bæði á höfuðborgarsvæðinu og víðar um landið. Hann taldi þó mikilvægt að halda vel utan um starfið næstu ár svo áhugi barnanna héldist áfram þegar þau eldust.
Hlusta má á ítarlegri umfjöllun í spilaranum hér að neðan.