Pétur Gunnlaugsson ræddi við Ólaf Adolfsson, þingmann Sjálfstæðisflokksins í síðdegisútvarpinu um fyrirhugaða þjóðaratkvæðagreiðslu um áframhald aðildarviðræðna Íslands við Evrópusambandið. Í viðtalinu gagnrýndi Ólafur að almenningi og Alþingi hefðu ekki verið lagðar fram fullnægjandi upplýsingar um kostnað, áhrif og markmið aðildarferlisins og taldi að þjóðin ætti að vita mun betur hvað væri í húfi áður en ákvörðun yrði tekin. Hlusta má á þáttinn í spilaranum hér að neðan.
Telur eðlilegt að Ólafur Ragnar taki þátt í ESB-umræðunni
Pétur benti á að Ólafur Ragnar Grímsson, fyrrverandi forseti Íslands, myndi taka þátt í fundi um Evrópumálin 6. júlí undir merkjum Áfram Ísland, og spurði hvort það kæmi honum á óvart. Ólafur sagði það vera í fullu samræmi við þá afstöðu sem Ólafur Ragnar hefði haft í gegnum tíðina og að hann hefði aldrei hikað við að taka afstöðu þegar stór fullveldismál væru annars vegar.
Ólafur rifjaði sérstaklega upp Icesave-deiluna og sagði að á þeim tíma hefði Ólafur Ragnar verið einn af fáum sem staðið hefðu fast gegn þeim þrýstingi sem Ísland sætti erlendis. Hann taldi því eðlilegt að fyrrverandi forsetinn legði nú sitt af mörkum til umræðunnar um mögulega aðild Íslands að Evrópusambandinu og sagðist búast við að sjónarmið hans myndu hafa vægi í komandi umræðum.
Segir mikilvægar upplýsingar vanta
Aðspurður um kostnað og áhrif hugsanlegrar ESB-aðildar sagði Ólafur að ljóst væri að aðild kallaði á umfangsmikið regluverk og fjölgun starfa innan stjórnsýslunnar. Hann sagði þó að hvorki stjórnvöld né stuðningsmenn aðildar hefðu lagt fram skýrar upplýsingar um hversu mikill kostnaðarauki fylgdi því eða hvaða breytingar Íslendingar gætu vænst.
Ólafur sagðist jafnframt sakna skýrra samningsmarkmiða af hálfu ríkisstjórnarinnar. Að hans mati hefðu ráðherrar og stuðningsmenn aðildar ekki útskýrt hvaða ávinningur ætti að fást með nýjum viðræðum umfram þá stöðu sem Ísland hefði nú þegar í gegnum EES-samninginn. Hann sagði umræðuna of oft byggjast á almennum fullyrðingum um lægri vexti, minni verðbólgu eða upptöku evru, þótt slík atriði yrðu ekki hluti af sjálfum aðildarviðræðunum.
Vill að þjóðin viti hvað hún greiðir atkvæði um
Í framhaldinu ræddu þeir um þjóðaratkvæðagreiðslu um framhald aðildarviðræðna. Ólafur sagði að jákvæð niðurstaða fæli í reynd í sér umboð til að hefja aðildarferli Íslands að Evrópusambandinu á ný og því yrði að liggja skýrt fyrir hvaða skuldbindingar og breytingar gætu fylgt því.
Hann nefndi sérstaklega sjávarútveg, landbúnað og umfang Evrópuregluverksins sem málaflokka sem gætu haft veruleg áhrif á Ísland við hugsanlega aðild. Að hans mati ætti umræðan að byggjast á skýrum upplýsingum um hvað fælist í umsókninni og hvaða breytingar yrðu raunverulega til umræðu, þannig að kjósendur vissu nákvæmlega um hvað þeir væru að greiða atkvæði.
Hlusta má á ítarlegri umfjöllun í spilaranum hér að neðan.