Kristján Örn Elíasson ræddi við Björgvin Víglundsson, fyrrverandi Íslandsmeistara öldunga í skák í þættinum Við skákborðið um Áskorendaflokk Skákþings Íslands. Þar kom fram að mótið hefur einkennst af óvæntum úrslitum þar sem ungir og efnilegir skákmenn hafa staðið sig afar vel gegn reyndum meisturum og sýnt að ný kynslóð er að ryðja sér til rúms í íslensku skáklífi. Hlusta má á þáttinn í spilaranum hér að neðan.
Ungir keppendur hrista upp í mótinu
Áskorendaflokkur Skákþings Íslands stendur nú yfir í húsakynnum Taflfélags Reykjavíkur og hefur vakið athygli fyrir mikla spennu og ófyrirsjáanleg úrslit. Björgvin benti á að þar mætist annars vegar, reyndir skákmenn og titilhafar og hins vegar, ungir keppendur sem hafa tekið miklum framförum á skömmum tíma. Meðal þeirra eru Haukur Víðis Leósson og Pétur Ernir, sem þrátt fyrir ungan aldur hafa þegar náð árangri gegn sterkum mótherjum.
Hæfileikar sem gætu skilað stórmeistaratitlum
Að mati Björgvins búa nokkrir af yngstu keppendum mótsins yfir óvenjulegum hæfileikum. Hann taldi að ef þeir héldu áfram markvissri æfingu og uppbyggingu gætu þeir náð mjög langt á alþjóðlegum vettvangi. Í þættinum var útskýrt að árangur ungra skákmanna væri ekki aðeins mældur í stigatölu heldur einnig í því hvernig þeir takast á við sterka og reynslumikla andstæðinga. Þess vegna geti stigaskráning gefið takmarkaða mynd af raunverulegum styrkleika ungra keppenda sem eru í hraðri framþróun.
Mótið opið og erfitt að spá fyrir um úrslit
Þrátt fyrir að nokkrir titilhafar taki þátt í mótinu er staðan afar jöfn. Meðal efstu manna eru FIDE-meistararnir Sigurbjörn Björnsson og Bárður Örn Birgisson ásamt fleiri sterkum keppendum,en yngri kynslóðin hefur ítrekað sýnt að hún getur veitt þeim harða keppni. Björgvin taldi að einmitt þessi blanda reynslu og ungra hæfileika væri það sem gerði Áskorendaflokkinn svo áhugaverðan í ár. Nánast hver einasta umferð gæti skilað óvæntum úrslitum og því væri erfitt að segja fyrir um hver stæði uppi sem sigurvegari þegar mótinu lýkur.
Hlusta má á ítarlegri umfjöllun í spilaranum hér að neðan.