Pétur Gunnlaugsson ræddi við Pál Vilhjálmsson, blaðamann og bloggara, í síðdegisútvarpinu, um niðurstöðu þjóðaratkvæðagreiðslunnar og framtíð samskipta Íslands við Evrópusambandið. Páll sagði niðurstöðuna svo afgerandi pólitískt, að engri ríkisstjórn næsta áratuginn myndi detta í hug að sækjast eftir aðild Íslands að ESB, sama hvernig meirihlutar á Alþingi skipuðust. Hlusta má á þáttinn í spilaranum hér að neðan.
Þjóðaratkvæðagreiðslan breytti stöðunni
Páll bar stöðuna á Íslandi saman við Bretland þar sem tæpur áratugur er liðinn frá Brexit-kosningunni og aftur er farið að ræða mögulega aðild að Evrópusambandinu.
Hann velti því upp hversu lengi niðurstaða þjóðaratkvæðagreiðslu hefði pólitískt gildi og hvort bresk stjórnvöld gætu síðar sótt um aðild á grundvelli þingmeirihluta eða þyrftu að leita aftur til þjóðarinnar. Á Íslandi væri hins vegar nýbúið að greiða atkvæði um hvort halda ætti áfram á þeirri leið að sækjast eftir aðild að ESB. Páll sagði þjóðina hafa sagt skýrt nei.
Engin stjórnvöld reyni þetta næsta áratuginn
Páll sagði niðurstöðuna hafa skapað pólitíska stöðu sem stjórnvöld gætu ekki einfaldlega horft fram hjá.
Þá segir Páll að það muni engin stjórnvöld, alveg sama hvernig mál skipast á Alþingi Íslendinga, það muni engum stjórnvöldum í næsta áratuginn detta í hug að sækjast eftir aðild Íslands að Evrópusambandinu. Pétur sagði allar líkur á að Ísland gengi aldrei í Evrópusambandið.
Páll tók undir það og sagði allar líkur á að Ísland gengi „nákvæmlega aldrei“ í sambandið.
Ísland hafi aðra kosti
Páll sagði legu Íslands á miðju Norður-Atlantshafi gefa landinu aðra möguleika en að ganga í Evrópusambandið. Ísland væri þegar með samningssamband við ESB og gæti jafnframt gert fríverslunarsamninga við önnur ríki. Hann nefndi Kína, Bandaríkin og Bretland í því samhengi.
Smæð Íslands gerði erlendum ríkjum auðveldara að semja við landið þar sem íslenskur markaður væri ekki þess eðlis að önnur ríki þyrftu að óttast mikla röskun á eigin mörkuðum.
Páll sagði Ísland því eiga auðveldara með að gera sjálfstæða fríverslunarsamninga en ef landið væri innan Evrópusambandsins, þar sem sameiginleg viðskiptastefna sambandsins tæki við.
Vill sterk tengsl í báðar áttir
Skynsamlegast fyrir Ísland væri að byggja sterk tengsl bæði við Bandaríkin og Evrópu í stað þess að velja annað sambandið fram yfir hitt.
Hlusta má á ítarlegri umfjöllun í spilaranum hér að neðan.