Pétur Gunnlaugsson ræddi við Pál Halldór Halldórsson, rallýökumann og jeppaáhugamann í síðdegisútvarpinu, um þróun rallýíþróttarinnar á Íslandi og hvernig síhækkandi kostnaður hefur breytt samkeppninni. Páll segir að áður hafi metnaður og stuðningur fyrirtækja skipt miklu máli en í dag ráði fjárhagurinn sífellt meira úrslitum. Hlusta má á þáttinn í spilaranum hér að neðan.
Dýr íþrótt
Páll sagði rallý hafa verið stórt sjónvarpsefni um árabil og rifjaði upp að á síðasta ári hefði verið fagnað 50 ára afmæli rallýs á Íslandi. Hann nefndi meðal annars Ómar Ragnarsson og Jón Ragnarsson sem brautryðjendur í greininni og sagði keppnina hafa notið mikilla vinsælda. Að hans sögn hefur kostnaðurinn hins vegar aukist verulega. Nýjustu keppnisbílarnir kosti tugi milljóna króna og því eigi sífellt færri kost á að kaupa búnað sem geti keppt um efstu sætin.
Erfitt að keppa við fjársterka aðila
Í umræðunni kom fram að eldri rallýbílar væru enn notaðir en þeir sem hefðu bolmagn til að kaupa nýjustu bílana nytu augljóss forskots. Páll rifjaði upp að þegar hann hóf keppni hefði hann ásamt samstarfsmönnum stofnað félag utan um verkefnið og gert samstarfssamninga við fyrirtæki. Þannig hefði tekist að fjármagna þátttöku án þess að byggja eingöngu á styrkjum.
Hann sagði að slíkt væri orðið erfiðara í dag og margir keppendur þyrftu að reiða sig á eigin fjármuni eða stuðning fjölskyldu og vina.
Fjárhagurinn ræður úrslitum
Páll sagði að þeir sem hefðu mest fjármagn gætu endurnýjað búnað oftar, haldið bílunum betur við og jafnvel sent þá erlendis í yfirhalningu milli keppna. Að hans mati hefði það orðið til þess að fjárhagurinn skipti meira máli en áður og forskot fjársterkustu liðanna væri orðið sífellt meira.
Hlusta má á ítarlegri umfjöllun í spilaranum hér að neðan.