Arnþrúður Karlsdóttir ræddi við Valgerði Snæland Jónsdóttur, fyrrverandi skólastjóra, sérkennslufræðing og löggiltan náms- og starfsráðgjafa, og Leif Árnason, fyrrverandi flugstjóra, í Fréttum vikunnar um áhrif alþjóðlegra stofnana á íslenskt skólakerfi. Valgerður gagnrýndi að heimsmarkmið Sameinuðu þjóðanna væru orðin áberandi í grunnskólum og spurði hverjir hefðu ákveðið innleiðingu þeirra og hvaða skuldbindingar fylgdu þátttöku skóla í verkefnum UNICEF og UNESCO. Hlusta má á þáttinn í spilaranum hér að neðan.
Heimsmarkmiðin komin inn í kennslustofurnar
Valgerður lýsti grunnskólum þar sem heimsmarkmið Sameinuðu þjóðanna væru innrömmuð á veggjum kennslustofa og stöðugt fyrir augum nemenda. Hún gagnrýndi að pólitísk stefnumörkun fengi slíkt vægi í skyldunámi barna þar sem hefðbundin grunnmenntun ætti að vera í fyrirrúmi.
Sérstaklega gagnrýndi hún að kennarar gerðu sér ekki nægilega grein fyrir því hvaða hugmyndafræði væri verið að innleiða í skólunum.
Spyr um skuldbindingar UNICEF- og UNESCO-skóla
Valgerður vakti athygli á að grunnskólar í sumum sveitarfélögum væru orðnir UNICEF-skólar og að framhaldsskólar tækju þátt í verkefnum UNESCO.
Hún segir nauðsynlegt að fá svör við því hvað þátttakan fæli í sér, hvort undirritaðir hefðu verið samningar og hvaða áhrif alþjóðlegu samtökin hefðu á starfsemi skólanna.
Leifur benti á að heimsmarkmiðin 17 hljómuðu vel á pappír en framkvæmd þeirra væri annað mál. Nauðsynlegt væri að skoða hvaða breytingar fylgdu innleiðingu þeirra.
Breytingar á skólakerfinu frá árinu 1974
Valgerður rifjaði upp breytingar á íslensku grunnskólakerfi eftir setningu grunnskólalaga árið 1974, meðal annars á stjórnun skóla, námsbókaútgáfu og aðalnámskrám.
Hún spurði hverjir hefðu mótað þessar breytingar og hversu mikil áhrif alþjóðleg stefnumörkun hefði haft á þróun íslensks menntakerfis.
Leifur nefndi ráðstefnu Sameinuðu þjóðanna um umhverfi mannsins í Stokkhólmi árið 1972 og hvernig alþjóðleg stefnumótun um umhverfismál og sjálfbærni hefði þróast í kjölfarið.
Valgerður lagði áherslu á að almenningur þyrfti að vita hverjir tækju ákvarðanir um menntun barna og hvaða alþjóðlegar skuldbindingar hefðu áhrif á íslenskt skólastarf.
Hlusta má á ítarlegri umfjöllun í spilaranum hér að neðan.