Pétur Gunnlaugsson ræddi við Sigfús Aðalsteinsson, oddvita Okkar borgar og Baldur Borgþórsson sem skipar 2.sæti lista Okkar borgar í síðdegisútvarpinu um rekstur Reykjavíkurborgar, fjárhagsstöðu borgarinnar og forgangsröðun í útgjöldum. Þeir sögðu borgina reka sig með ósjálfbærum hætti og gagnrýndu bæði skuldaaukningu og umfangsmikla sóun innan stjórnkerfisins. Hlusta má á þáttinn í spilaranum hér að neðan.
Fjárhagsstaða borgarinnar verri en haldið hefur verið fram
Sigfús sagði borgaryfirvöld hafa kynnt fjárhagsstöðu Reykjavíkurborgar með of jákvæðum hætti síðustu misseri. Hann sagði að í haust hefði verið talað um að rekstur borgarinnar stefndi í hagnað en síðar hefði komið í ljós að borgin væri að tapa um 6 milljörðum króna. Að hans mati sýndi það að reksturinn væri kominn í alvarlegan vanda. Hann gagnrýndi jafnframt hvernig eignir og félög tengd Reykjavíkurborg væru metin í uppgjörum og sagði borgina hafa reitt sig of mikið á hækkun eigna og tilfærslur innan samstæðu borgarinnar.
Hann nefndi meðal annars Félagsbústaði og Orkuveitu Reykjavíkur í því samhengi og sagði að með slíkum aðgerðum væri verið að fegra stöðuna í stað þess að taka á undirliggjandi rekstrarvanda.
Vilja skera niður útgjöld vegna hælisleitenda
Sigfús sagði Okkar borg vilja draga verulega úr útgjöldum sem tengdust þjónustu við hælisleitendur í Reykjavík. Hann sagði kostnað vegna húsnæðis, félagsþjónustu og annarrar aðstoðar hafa aukist mikið á undanförnum árum og borgarbúar bæru kostnaðinn. Að þeirra mati ætti ríkið að bera fjárhagslega ábyrgð á þeim málaflokki í stað Reykjavíkurborgar. Þeir sögðu fjármuni borgarinnar eiga að fara í grunnþjónustu fyrir íbúa, þar á meðal leikskóla, skólamál og innviði.
Gagnrýna umfang stjórnkerfis borgarinnar
Í viðtalinu kom einnig fram gagnrýni á umfang stjórnkerfis Reykjavíkurborgar. Baldur sagði reksturinn einkennast annað hvort af vanhæfni eða hugmyndafræði sem tæki ekki mið af kostnaði og rekstrarlegri ábyrgð. Þeir nefndu meðal annars framkvæmdir við Brákarborg sem dæmi um mjög kostnaðarsama uppbyggingu og sögðu Reykjavíkurborg verja mun meiri fjármunum í slíkar framkvæmdir en önnur sveitarfélög.
Vilja rannsaka bókhald borgarinnar
Sigfús sagði jafnframt að Okkar borg vildi fara ítarlega yfir bókhald borgarinnar og skoða hvernig fjármunum hefði verið ráðstafað undanfarin ár. Hann sagði mikilvægt að borgarbúar fengju skýrari mynd af því hvernig fjármagni Reykjavíkurborgar væri varið.
Hlusta má á ítarlegri umfjöllun í spilaranum hér að neðan.