Arnþrúður Karlsdóttir ræddi við Guðrúnu Hafsteinsdóttur, formann Sjálfstæðisflokksins í síðdegisútvarpinu í dag um fyrirhugaða þjóðaratkvæðagreiðslu um viðræður við Evrópusambandið á ný. Gagnrýni kom fram á að kjósendur hefðu ekki fengið skýrar upplýsingar um hvaða markmið íslensk stjórnvöld hygðust leggja til grundvallar ef niðurstaðan yrði sú að halda viðræðunum áfram. Hlusta má á þáttinn í spilaranum hér að neðan.
Kjósendur viti ekki hvert viðræðurnar eigi að leiða
Þjóðaratkvæðagreiðslan í ágúst snýst um hvort halda eigi áfram vegferð í átt að Evrópusambandinu. Þrátt fyrir það liggur ekki fyrir hvaða kröfur íslensk stjórnvöld hyggjast gera eða hvaða hagsmuni þau telja ófrávíkjanlega í hugsanlegum samningaviðræðum sagði Guðrún.
Guðrún sagði að mikil óvissa ríkti um afstöðu stjórnvalda til sjávarútvegs, landbúnaðar, orkumála og fleiri málaflokka sem hafa verið meðal stærstu álitamála í samskiptum Íslands og Evrópusambandsins. Án slíkra upplýsinga sé erfitt fyrir kjósendur að meta hvaða afleiðingar áframhald viðræðna gæti haft fyrir landið.
Ólík afstaða stjórnarflokkanna
Í þættinum kom fram hjá Guðrúnu að Evrópumálið hafi,um árabil, verið eitt helsta stefnumál Viðreisnar og stór þáttur í pólitískri tilveru flokksins. Á sama tíma hafi aðrir stjórnarflokkar tekið aðra afstöðu til málsins á þessu kjörtímabili. Flokkur fólksins hafi, til að mynda, ítrekað lagt fram tillögur á Alþingi um að umsókn Íslands að Evrópusambandinu yrði dregin til baka. Nú standi flokkurinn hins vegar að ríkisstjórn sem hyggst leggja málið fyrir kjósendur á ný.
Þá hefur vakið athygli að einstakir þingmenn innan stjórnarliðsins hafa lýst yfir andstöðu við aðild Íslands að Evrópusambandinu þrátt fyrir stuðning við þjóðaratkvæðagreiðsluna.
Evrópumálið var ekki meðal stærstu kosningamála
Í þættinum vakti Guðrún athygli á að þegar kosið hafi verið til Alþingis árið 2024 hafi umræðan beinst, að mestu að vöxtum, húsnæðismálum, heilbrigðisþjónustu og öðrum verkefnum innanlands. Evrópusambandsmálið hafi ekki verið í forgrunni kosningabaráttunnar með sama hætti og nú. Guðrún vakti athygli á hvort ríkisstjórnin hefði fengið skýrt umboð til að gera málið að einu stærsta verkefni kjörtímabilsins. Á meðan verðbólga hafi reynst þrálát og vextir haldist háir, hafi sífellt meiri pólitísk orka farið í undirbúning þjóðaratkvæðagreiðslunnar og umræðu um framtíðarsamband Íslands við Evrópusambandið.
Hlusta má á ítarlegri umfjöllun í spilaranum hér að neðan.