Arnþrúður Karlsdóttir ræddi við Guðrúnu Hafsteinsdóttur, formann Sjálfstæðisflokksins í síðdegisútvarpinu um efnahagsmál, Evrópusambandið og þau áhrif sem aðild Íslands að sambandinu gæti haft á verðbólgu, vexti og lífskjör. Þar kom fram hörð gagnrýni á málflutning ríkisstjórnarinnar um efnahagslegan ávinning ESB-aðildar. Verið væri að skapa væntingar um efnahagslegan ávinning sem ekki ætti sér stoð í raunverulegri stöðu Evrópuríkja. Hlusta má á þáttinn í spilaranum hér að neðan.
Lofað lægri vöxtum og verðbólgu
Guðrún gagnrýndi að stuðningsmenn aðildar Íslands að Evrópusambandinu hefðu tengt aðildina við lægri verðbólgu, lægri vexti, lægra matvælaverð og betri stöðu ungs fólks á húsnæðismarkaði. Slíkar fullyrðingar væru settar fram eins og aðild að sambandinu myndi sjálfkrafa leysa þau efnahagslegu vandamál sem íslenskt samfélag glímir við.
Efnahagslegar áskoranir væru víða til staðar innan Evrópusambandsins og aðild að sambandinu hefði ekki komið í veg fyrir verðbólgu eða húsnæðisvanda í mörgum aðildarríkjum. Því væri varhugavert að kynna ESB-aðild sem einfalda lausn á flóknum efnahagsmálum.
Evrópa glímir við eigin vanda
Efnahagsstaða Evrópu sjálfrar var einnig til umræðu. Guðrún benti á að hagvöxtur hefði verið hægur víða á evrusvæðinu og samkeppnishæfni Evrópu hefði veikst á undanförnum árum. Jafnframt nefndi hún dæmi um að verðbólga væri enn töluverð í ýmsum ríkjum Evrópusambandsins þrátt fyrir að þau notuðu evruna.
Lágir vextir á evrusvæðinu væru ekki endilega merki um sterkt efnahagsástand heldur gætu þeir endurspeglað tilraunir stjórnvalda og seðlabanka til að örva hagkerfi sem glíma við hægan vöxt og litla fjárfestingu.
Húsnæðisvandinn hverfur heldur ekki með ESB-aðild
Evrópusambandið mun heldur ekki auðvelda fólki að eignast húsnæði sagði Guðrún. Víða í Evrópu væri fólk eldra þegar það kæmist í eigið húsnæði en hér á landi og hlutfall þeirra sem byggju í leiguhúsnæði væri víða hærra en á Íslandi. Húsnæðisverð og vaxtastig ráðist af fjölmörgum þáttum og engar vísbendingar lægju fyrir um að ESB-aðild, ein og sér, myndi breyta þeirri stöðu á íslenskum húsnæðismarkaði.
Vandi ríkisstjórnarinnar verður ekki leystur í Brussel
Einnig gagnrýndi Guðrún áherslu ríkisstjórnarinnar að setja Evrópumálið í forgrunn á sama tíma og verðbólga, vextir og ríkisfjármál væru meðal stærstu viðfangsefna landsins. Stjórnvöld bæru sjálf ábyrgð á efnahagsstjórn landsins og lausnir á þeim verkefnum sem Ísland stendur frammi fyrir yrðu ekki fundnar í Brussel.
Í því samhengi var vísað til nýrrar skýrslu Alþjóðagjaldeyrissjóðsins þar sem hvatt er til aðhalds í ríkisfjármálum. Megináherslan ætti að vera á að ná niður verðbólgu, skapa svigrúm til vaxtalækkana og styrkja efnahagslífið hér á landi fremur en að beina pólitískri orku í aðildarferli að Evrópusambandinu.
Hlusta má á ítarlegri umfjöllun í spilaranum hér að neðan.