Arnþrúður Karlsdóttir ræddi við Arnar Þór Jónsson, lögmann og formann Lýðræðisflokksins í síðdegisútvarpinu um upplýsingagjöf stjórnvalda fyrir þjóðaratkvæðagreiðsluna um framhald aðildarviðræðna við Evrópusambandið. Arnar sagði ríkisstjórnina og stuðningsmenn aðildar, sjálfa standa fyrir mestu upplýsingaóreiðunni með fullyrðingum um lægri vexti, ódýrari matvæli og undanþágur sem engin trygging væri fyrir að Ísland fengi. Hlusta má á þáttinn í spilaranum hér að neðan.
Erlendir ráðherrar fengnir til landsins
Arnþrúður sagði stjórnvöld vara við erlendum afskiptum og upplýsingaóreiðu fyrir þjóðaratkvæðagreiðsluna. Á sama tíma hefðu ráðherrar frá ríkjum ESB verið fengnir hingað til lands til að ræða sambandið og hugsanlega aðild Íslands.
Í því sambandi var nefnt að ráðherrar frá Spáni og Frakklandi hefðu komið hingað til lands. Franska ráðherranum hefði verið boðið til landsins en hann hefði ekki viljað svara skýrt hvort Ísland gæti fengið varanlega undanþágu fyrir sjávarútveginn. Þess í stað hefði hann vísað til þess að samninganefndir myndu taka ákvörðun um málið.
Fullyrðingar án tryggingar
Arnar Þór var spurður hver stæði í raun fyrir mestu upplýsingaóreiðunni í ESB-umræðunni. Arnar svaraði að það væri fyrst og fremst ríkisstjórnin sjálf og þeir sem berðust fyrir jái í þjóðaratkvæðagreiðslunni.
Hann nefndi kynningu þar sem gefið hefði verið til kynna að mjólkurverð væri mun lægra innan ESB. Upplýsingarnar hefðu reynst rangar eða settar fram með missvísandi hætti.
Sama ætti við um fullyrðingar um að vextir lækkuðu við inngöngu í sambandið. Arnar sagði engan geta lofað slíkri niðurstöðu enda réðust vextir af fjölmörgum þáttum sem tengdust ekki aðildinni einni saman.
Orðalagið ” viðræður” villir um fyrir fólki
Stjórnvöld hefðu einnig gefið í skyn að Ísland gæti fengið undanþágur frá sameiginlegum stefnum ESB. Erlendu ráðherrarnir sem fengnir hefðu verið til landsins hefðu hins vegar ekki veitt nein bindandi loforð um varanlegar undanþágur.
Arnar sagði annað dæmi um óskýra upplýsingagjöf vera hvernig talað væri um aðildarviðræður. Stundum væri ferlinu lýst sem óskuldbindandi samtali en næst væri rætt um hvað Ísland gæti fengið með samningum.
Að hans sögn snerist ferlið fyrst og fremst um aðlögun íslenskra laga að regluverki ESB. Ekki væri hægt að lofa því að Ísland fengi að halda eigin reglum þar sem þær stönguðust á við grundvallarstefnu sambandsins.
Ríkisstjórnin ætti að víkja ef svarið verður nei
Arnar sagði ríkisstjórnina hafa varið vorinu og sumrinu í ESB-málið í stað þess að sinna ríkisfjármálum og öðrum verkefnum. Ef þjóðin hafnaði framhaldi viðræðna með afgerandi hætti hefði stjórnin að hans sögn enga réttlætingu fyrir því að halda áfram og ætti að víkja.
Hlusta má á ítarlegri umfjöllun í spilaranum hér að neðan.