Ríkisstjórnin hefur samþykkt að halda áfram vinnu við að móta skýrari umgjörð um einkarekin námsúrræði sem starfa á mörkum framhalds- og háskólastigs. Ákvörðunin byggir á tillögum starfshóps sem forsætisráðherra skipaði í nóvember 2025 til að greina stöðu einkarekinna skóla á þessu sviði og leggja fram hugmyndir um skýrari stefnu og lagaumgjörð.
Núverandi kerfi talið óskýrt
Í skýrslu starfshópsins kemur fram að núverandi fyrirkomulag einkarekinna skóla á framhaldsskólastigi einkennist af takmarkaðri samhæfingu milli málaflokka og óskýrum tengslum milli viðurkenningar skóla, samningsgerðar og opinbers stuðnings. Þá segir að skorti á samræmda stefnu um nám sem er á mörkum framhalds- og háskólastigs. Að mati starfshópsins þurfi að auka fyrirsjáanleika og tryggja betur jafnræði nemenda óháð rekstrarformi skóla.
Fjórar tillögur lagðar fram
Starfshópurinn leggur til að lög um framhaldsskóla verði endurskoðuð með það að markmiði að skýra betur tengsl viðurkenninga, samninga og fjármögnunar sjálfstætt rekinna skóla. Jafnframt er lagt til að afmörkun náms á 4. hæfniþrepi og náms á mörkum skólastiga verði skýrð til að auðvelda samfellu náms og auka fyrirsjáanleika fyrir nemendur.
Aðrar tillögur snúa að mótun heildstæðrar stefnu um listnám á framhaldsskólastigi og skýrari umgjörð um flugnám og flugtengdar greinar.
Stefnt að auknu jafnræði nemenda
Markmið tillagnanna er að skapa skýrari ábyrgð hins opinbera, bæta samfellu milli skólastiga og stuðla að auknu jafnræði nemenda.
Áfram verður unnið að útfærslu tillagnanna í samstarfi þeirra ráðuneyta sem fara með málefnið. Fjárhagsleg áhrif breytinganna verða metin við frekari vinnslu málsins.