Marco Rubio, utanríkisráðherra Bandaríkjanna, segir að aðild Úkraínu að Atlantshafsbandalaginu sé ekki á dagskrá eins og staðan er nú. Bandaríkin einbeiti sér þess í stað að því hvort unnt sé að binda enda á stríðið í Úkraínu. Þetta sagði Rubio þegar hann svaraði spurningu Útvarps Sögu á blaðamannafundi utanríkisráðuneytisins í Safnahúsinu í Reykjavík.
Rubio var spurður um hver afstaða hans væri til NATO-aðildar Úkraínu og hvort hann teldi að Úkraína ætti að verða aðili að bandalaginu. Rubio svaraði ekki spurningunni með einföldu jái eða nei heldur sagði að aðild Úkraínu að NATO væri ekki á dagskrá eins og staðan væri nú.
Einróma samþykki þarf innan NATO
Rubio benti á að innganga nýs ríkis í Atlantshafsbandalagið krefðist samþykkis allra aðildarríkjanna. Hann sagði að Bandaríkin einbeittu sér nú fyrst og fremst að því að reyna að binda enda á stríðið í Úkraínu, væri það mögulegt.
Hann sagði mannfallið í stríðinu mikið og að Bandaríkin hefðu gert ljóst að þau væru reiðubúin að gegna uppbyggilegu hlutverki ef þau gætu stuðlað að því að átökunum lyki.
Bandaríkin fylgjast vel með þróun mála
Rubio bætti þó við að Bandaríkin fylgdust með þróun mála og að hún benti ekki til þess að stríðið stefndi í átt að lausn eins og staðan væri nú.
Svar Rubios var því skýrt um stöðuna eins og hún er nú: NATO-aðild Úkraínu er ekki á dagskrá og áhersla Bandaríkjanna er á að reyna að ná fram lokum stríðsins.
Hér að neðan má sjá myndasyrpu frá fundinum í flettimyndaröð.
Horfa má á upptöku frá blaðamannafundinum hér að neðan.