Umhverfis-, orku- og loftslagsráðherra, Orkuveitan, Landsvirkjun og HS Orka undirrituðu í gær samstarfssamning um undirbúning og framkvæmd þriðju djúpnýtingarholunnar í IDDP-verkefninu, Iceland Deep Drilling Project. Holan verður boruð á Nesjavöllum síðar á þessu ári og er markmið verkefnisins að hraða þróun næstu kynslóðar jarðvarmakerfa á Íslandi.
Undirritunin fór fram í húsakynnum Orkuveitunnar að Bæjarhálsi. Verkefnið er hluti af langtímastefnu stjórnvalda í orkumálum og beinist að nýtingu svokallaðs ofurheits jarðhita djúpt í jarðskorpunni.
Stefnt að margfalt meiri framleiðslugetu
Jóhann Páll Jóhannsson umhverfis-, orku- og loftslagsráðherra segir Ísland hafa einstaka stöðu á sviði jarðhita og að ríkisstjórn Kristrúnar Frostadóttur hyggist styrkja samkeppnishæfni landsins enn frekar með því að ráðast í verkefni sem ekki hafi áður verið reynd hér á landi.
Í því felist meðal annars að bora niður á mikið dýpi til að beisla ofurheit jarðvarmakerfi sem geti skilað margfalt meiri framleiðslugetu en hefðbundnar jarðhitaholur. Ráðherrann segir verkefnið geta haft veruleg áhrif á orkukerfi landsins, verðmætasköpun og útflutning íslenskrar þekkingar, auk þess sem það geti styrkt orkuskipti og loftslagsaðgerðir á heimsvísu.
Þróun á nýrri kynslóð jarðhitakerfa
Hera Grímsdóttir, framkvæmdastýra rannsókna og nýsköpunar hjá Orkuveitunni, segir IDDP-3 vera lykilskref í svokallaðri djúpnýtingarvegferð fyrirtækisins. Verkefnið snúist ekki eingöngu um eina borholu heldur um þróun tækni og þekkingar sem geti gert nýtingu ofurheits jarðhita mögulega á næstu árum.
Hún segir samstarf orkufyrirtækja og stjórnvalda skipta sköpum til að hraða þróuninni og styrkja stöðu Íslands sem leiðandi lands í sjálfbærum orkulausnum.
Heitasta jarðhitahola heims boruð á Íslandi
Frá árinu 2000 hafa stærstu orkufyrirtæki landsins, í samstarfi við stjórnvöld og erlenda aðila, unnið að þróun tækni til að nýta jarðhita við mun hærra hitastig en áður hefur verið mögulegt. Tvær fyrri tilraunaholur verkefnisins hafa skilað mikilvægri þekkingu á ofurheitum jarðhita þar sem hitastig getur farið yfir 350 til 400 gráður á Celsíus.
Bjarni Pálsson, framkvæmdastjóri vinds og jarðvarma hjá Landsvirkjun, segir IDDP-verkefnið eitt sterkasta dæmið um rannsóknarsamstarf íslenska jarðhitageirans. Hann bendir á að fyrsta holan í verkefninu, IDDP-1 í Kröflu sem boruð var árið 2009, sé enn heitasta jarðhitahola sem boruð hefur verið í heiminum.
Byggir á reynslu frá Reykjanesi
Lilja Magnúsdóttir, framkvæmdastjóri auðlinda hjá HS Orku, segir IDDP-3 byggja á reynslu sem fékkst við IDDP-2 holuna á Reykjanesi. Þar hafi í fyrsta sinn tekist að staðfesta ofurkrítískar aðstæður í íslensku jarðhitakerfi.
Að hennar sögn hafi sá áfangi skapað mikilvæga þekkingu sem nú verði nýtt við þróun nýrra tæknilausna á Nesjavöllum. Hún segir áframhaldandi rannsóknir á ofurheitum jarðhita geta aukið bæði afköst og verðmætasköpun úr framtíðarjarðhitakerfum landsins.
Fékk 310 milljóna styrk
Í nýjum samningsramma verkefnisins er lögð áhersla á að IDDP-3 verði sameiginlegur vettvangur rannsókna, prófana og þekkingarsköpunar fyrir íslenskan jarðhitageira.
Nýlega hlaut verkefnið jafnframt 310 milljóna króna styrk úr Loftslags- og orkusjóði.