Arnþrúður Karlsdóttir ræddi við Guðrúnu Hafsteinsdóttur, formann Sjálfstæðisflokksins, í síðdegisútvarpinu í dag,um ákvörðun Seðlabankans um að hækka stýrivexti um 0,25% og sýtivextir því komnir í 8%. Guðrún sagði hækkunina mikil vonbrigði fyrir fjölskyldur, heimili og fyrirtæki og sagði ábyrgðina liggja hjá ríkisstjórninni. Hún sagði ríkisstjórnina fullkomlega ráðalausa í efnahagsmálum og hafa brugðist því verkefni að ná niður verðbólgu og vöxtum. Hlusta má á þáttinn í spilaranum hér að neðan.
Ríkisstjórnin ber ábyrgðina
Guðrún sagði ríkisstjórnina hafa tekið við völdum með loforð um að ná niður verðbólgu og vöxtum en þróunin hefði orðið í þveröfuga átt. Seðlabankinn gæti ekki einn borið ábyrgð á efnahagslegum stöðugleika og stjórnvöld yrðu að horfast í augu við áhrif eigin ákvarðana.
Arnþrúður vakti athygli á því að Seðlabankinn hefði nú með afgerandi hætti vísað til áhrifa aðgerða stjórnvalda. Guðrún sagði skatta- og gjaldahækkanir ríkisstjórnarinnar hafa aukið verðbólguþrýsting og rifjaði upp að Seðlabankinn hefði áður bent á áhrif þeirra.
Hún taldi því ekki hægt að líta á vaxtahækkunina sem einangraða ákvörðun bankans. Ríkisfjármálin og peningastefnan þyrftu að vinna saman að stöðugleika en ríkisstjórnin hefði ekki sinnt sínum hluta þess verkefnis. Seðalbankinn hefði sent frá sér þá skýringu að þessi hækkun stýrivaxta mætti rekja til gjaldahækkunar ríkisstjórnarinnar.
Kjarasamningar komnir í hættu
Guðrún tengdi stöðuna einnig við kjarasamningana og viðbrögð verkalýðshreyfingarinnar. Forsendur samninganna væru komnar í hættu og mögulegt væri að þeir yrðu lausir núna.
Hún gagnrýndi sérstaklega viðbrögð Kristrúnar Frostadóttur, forsætisráðherra, þegar kallað var eftir aðgerðum stjórnvalda. Kristrún hefði beðið verkalýðshreyfinguna og atvinnulífið um tillögur en Guðrún taldi það bera vott um að ríkisstjórnin hagaði sér eins og hún stæði utan við verkefnið.
Stjórnvöld bæru sjálf ábyrgð á að skapa efnahagslegan stöðugleika og gætu ekki beðið aðra um að leysa vandann fyrir sig.
Óttast nýjar skattahækkanir
Næstu fjárlög voru Guðrúnu sérstakt áhyggjuefni. Ríkisstjórnin hefði boðað hallalaus fjárlög en hún sæi ekki að nægilega hefði verið dregið úr ríkisútgjöldum til að það markmið næðist.
Af þeim sökum óttaðist hún að aftur yrði gripið til skattahækkana. Hún sagði ríkisstjórnina þegar hafa hækkað álögur á heimili og fyrirtæki þrátt fyrir fyrri yfirlýsingar um annað og taldi frekari skattahækkanir geta aukið vandann enn frekar.
Verðmætasköpunin hefur ekki skilað sér
Guðrún gagnrýndi einnig skort á aðgerðum til að styrkja tekjuhlið hagkerfisins. Ríkisstjórnin hefði fyrir ári boðað aukna verðmætasköpun og útflutningstekjur en hún sæi ekkert hafa gerst í þeim efnum.
Hún lagði áherslu á mikilvægi nýsköpunar og hugverkaiðnaðar og sagði Ísland hafa byggt upp mjög gott umhverfi fyrir fyrirtæki á fyrstu stigum. Slíkt samkeppnisforskot væri þó ekki sjálfgefið og gæti glatast ef stjórnvöld héldu ekki rétt á málum.
Guðrún taldi lausnina felast í ábyrgum ríkisfjármálum, auknu framboði húsnæðis og orku, meiri framleiðni og stöðugleika á vinnumarkaði. Hún sæi ekki að ríkisstjórnin væri að vinna nægilega að þessum verkefnum. Kjörtímabilið væri að nálgast hálfleik en árangurinn af þeim loforðum sem ríkisstjórnin hefði gefið um verðbólgu og vexti væri enginn.
Hlusta má á ítarlegri umfjöllun í spilaranum hér að neðan.