Arnþrúður Karlsdóttir ræddi við Sigmund Davíð Gunnlaugsson, formann Miðflokksins og fyrrverandi forsætisráðherra í síðdegisútvarpinu í dag,um áhrif aðildar Íslands að Evrópusambandinu á fullveldi, lýðræði og íslenska stjórnskipan. Sigmundur Davíð sagði að með aðild myndu Íslendingar framselja æðsta vald á sviði löggjafar, framkvæmdar, dómsmála og utanríkismála til stofnana ESB. Hlusta má á þáttinn í spilaranum hér að neðan.
Alþingi hefði ekki lengur æðsta löggjafarvaldið
Arnþrúður spurði hvort Alþingi héldi áfram að vera æðsta löggjafarvald landsins eftir inngöngu í ESB. Sigmundur svaraði því til að þingið gæti áfram sett lög og samþykkt fjárlög en hefði ekki heimild til að setja lög sem gengju gegn reglum sambandsins. Íslensk löggjöf þyrfti að víkja ef hún stangaðist á við Evrópurétt.
Aðspurður um áhrif þessa á hlutverk þingmanna sagði Sigmundur að þeir hefðu ekki lengur sama vald til að bregðast við kröfum kjósenda. Þeir gætu vísað til þess að ESB heimilaði ekki þær breytingar sem kallað væri eftir.
Dómsvaldið færðist að hluta úr landi
Arnþrúður spurði hvað yrði um íslenska dómsvaldið við inngöngu. Sigmundur sagði að íslenskir dómstólar yrðu lægra settir en dómstóll ESB þegar kæmi að túlkun og framkvæmd Evrópuréttar. Evrópusambandsreglur gengju framar íslenskum lögum og hefðu beina réttarverkan á íslenskan rétt, á mögum sviðum. Niðurstöðu hans yrði ekki áfrýjað til íslensks dómstóls.
Sigmundur hafnaði því að um væri að ræða einhvers konar deilingu fullveldisins með öðrum ríkjum, heldur væri verið að færa fullveldi frá einstökum ríkjum til yfirþjóðlegs valds ESB. Ísland fengi ekki sambærilegt vald yfir málefnum annarra ríkja á móti.
Vald almennings myndi minnka vegna ESB reglna
Um tengsl fullveldis og lýðræðis sagði Sigmundur að forsenda íslenska stjórnkerfisins væri að þjóðin réði sjálf sínum málum. Þegar stjórnvöld hefðu ekki lengur endanlegt ákvörðunarvald hefði almenningur heldur ekki sama vald til að krefja þau um breytingar.
Hann sagði að íslenskir kjósendur gætu skipt um ríkisstjórn en ekki kosið stjórnendur stofnana ESB frá völdum vegna ákvarðana sem hefðu áhrif hér á landi. Umræðan fyrir þjóðaratkvæðagreiðsluna þyrfti því fyrst og fremst að snúast um þessa stjórnkerfisbreytingu en ekki aðeins einstaka málaflokka á borð við sjávarútveg, landbúnað eða sæti við borðið.
Hlusta má á ítarlegri umfjöllun í spilaranum hér að neðan.