Fjármálaöflin, sem stýrt er af glóbalistum, vilja og eru á góðri leið með að yfirtaka samfélagið. Það er farið fram undir merkjum heimsmarkmiða Sameinuðu þjóðanna og margir átta sig ekki á að þessi glóbalistastefna stórskaðar samfélagið. Það þarf sterka andspyrnu gagnvart þessum öflum. Þetta segir Sigmundur Davíð Gunnlaugsson formaður Miðflokksins en hann var gestur í þætti Arnþrúðar Karlsdóttur.
Sigmundur segir að glóbalistavæðing fjármálakerfisins sé sérstaklega alvarleg því þannig sé hægt að ná svo miklum tökum á lífi fólks og völdum yfir því. Það sé gert með því að misbeita fjármálakerfinu í pólitískum tilgangi. Verið sé að taka peningaseðla úr umferð og gera fólk algerlega háð plastkortum og þar með bönkunum og fjármálaöflunum.
Framkvæmt í skjóli heimsmarkmiða Sameinuðu þjóðanna
Bankarnir stýra því svo hvort fólk fái lán til húsnæðiskaupa eða ekki og geta þannig stýrt því að fólk eignist husnæði eða ekki. Þar með sé verið að þjóna hagsmunum glóbalistanna sem sett hafa heimsmarkmið Sameinuðu þjóðanna í forgrunn en ein af þeirra stefnum sé að fólk verði eignalaust. Arnþrúður benti á að einmitt með notkun korta séu allar upplýsingar um hvernig fólk notar kortið skráðar og nú sé svo komið að Ísland.is viti all mikið um fólk.
Þarf nýja ríkisstjórn til að stöðva þessa þróun
Sigmundur segir að til þess að svona þróun geti ekki haldið áfram þurfi að hafa stefnufasta ríkisstjórn sem hafi kjark til þess að takast á við kerfið því ef ekki sé gripið í taumana haldi óheillaþróun áfram á þennan veg. Afleiðingar af þessari stefnu sé hægt að sjá í Kanada þar sem bændur og vörubílstjórar voru stimplaðir hægri öfgamenn og nasistar og valdi misbeitt, bankareikningum þeirra lokað og þeir hreinlega sveltir til hlýðni þegar þeir risu upp til mótmæla.
Glóbalistastefnan stórskaðar samfélagið
Þá sé þessi glóbalistastefna víðsvegar í samfélaginu og til að mynda í þjóðlendumálinu þar sem bændur og landeigendur eru í þeirri stöðu að ríkið ætlar að valta hreinlega yfir þá og taka af þeim land sem þeir eiga sannarlega og eiga meira segja afsöl fyrir. Þetta sé sú stefna sem er að stórskaða samfélagið og minni helst á þá stefnu sem uppi var í austur Evrópu fyrir áratugum síðan.
Það eftirlit sem haft er með borgurunum með þessari viðamiklu upplýsingaskráningu minni helst á það kerfi sem viðhaft sé í Kína sem byggist á umbunarkerfi þar sem þeim sem hlýði kerfinu er umbunað með félagslegum stigum sem þeir geta síðan notað til þess mögulega að geta eignast eitthvað í framtíðinni.
Hlusta má á þáttinn og ítarlegri umræður um heimsvaldastefnu glóbalista og fjármálaaflanna í spilaranum hér að neðan
