Í símatímanum á Útvarpi Sögu í morgun hringdi inn Jóhann Helgi sem hefur búið í Svíþjóð í 30 ár og ræddi við Arnþrúði Karlsdóttur um innflytjendamál, þróun sænsks samfélags og áhrif Evrópusambandsins á sænsku þjóðina. Hann sagði að reynsla sín af búsetu í Svíþjóð hefði mótað afstöðu hans til þessara mála og taldi að Íslendingar ættu að kynna sér þróunina þar áður en teknar yrðu stórar ákvarðanir um framtíð landsins. Svíar vildu ekki taka upp evru og margir stjórnmálaflokkar væru að flytja inn atkvæði þegar þeir hleyptu hælisleitendum nánast óhindrað inn í landið. Hlusta má á innslagið í spilaranum hér að neðan.
Sumir stjórnmálaflokkar eru að flytja inn atkvæði með innflytjendum
Jóhann Helgi sagði að samsetning þjóðarinnar hefði breyst verulega á síðustu áratugum og taldi að hlutfall íbúa af erlendum uppruna hefði aukist hratt. Hann sagði að hann hefði orðið var við breytingarnar bæði í Gautaborg, þar sem hann bjó áður, og síðar í Borås. Hann sagði að áhrif innflytjendamála á stjórnmál væru veruleg. Hann sagði aðspurður að sumir stjórnmálaflokkar hefðu litið á innflytjendur sem nýja kjósendahópa og væru í raun að flytja inn atkvæði.
Að hans mati hefði þessi þróun haft víðtæk áhrif á samfélagið, meðal annars á húsnæðismarkað, opinbera þjónustu og stjórnmálaumræðu. Hann taldi jafnframt að sænsk stjórnvöld hefðu um langt árabil fylgt stefnu sem stuðlaði að auknum innflutningi fólks og sagði aðspurður að stjórnvöld hefðu nýverið boðið fjárhagslegan hvata fyrir þá sem kysu að yfirgefa landið því ástandið í þjóðfélaginu væri orðið alvarlegt á mörgum sviðum.
Svíar vilja ekki evruna
Arnþrúður og Jóhann Helgi ræddu um Evrópusambandið og stöðu Íslands. Hann sagði að margir Svíar hefðu viljað halda í eigin gjaldmiðil og benti á að sænska þjóðin hefði hafnað upptöku evru í þjóðaratkvæðagreiðslu. Að hans mati endurspeglaði það vilja til að halda ákvörðunarvaldi yfir efnahagsmálum innanlands. Svíar vildu sjálfir fá að stjórna fjármálum landsins og vildu því ekki taka upp evru og vera háðir Seðlabanka Evrópu.
Hann taldi jafnframt að reglusetning Evrópusambandsins hefði aukist með árunum og haft sífellt meiri áhrif á aðildarríkin. Hann sagði að reynsla Svíþjóðar sýndi að aðild að Evrópusambandinu hefði ekki leitt til lægra húsnæðisverðs og taldi að mikill fólksfjölgunarþrýstingur hefði þvert á móti aukið eftirspurn eftir húsnæði.
Jóhann Helgi sagði að í umræðu um hugsanlega aðild Íslands að Evrópusambandinu væri mikilvægt að skoða reynslu annarra ríkja og kynna sér vel þær skuldbindingar sem þegar felast í EES-samningnum áður en frekari skref yrðu tekin.
Hlusta má á ítarlegri umfjöllun úr símatímanum í spilaranum hér að neðan.