Arnþrúður Karlsdóttir ræddi við Guðmund Kristjánsson, forstjóra Brims, í síðdegisútvarpinu um heimsókn Costas Kadis, sjávarútvegsstjóra Evrópusambandsins, til Brims og mögulegar undanþágur Íslands frá sameiginlegri sjávarútvegsstefnu ESB. Guðmundur sagði Kadis ekki hafa lofað einu né neinu um undanþágur eða sérstöðu Íslands og tók fram að hann hefði heldur ekkert umboð til að veita slík loforð. Hlusta má á þáttinn í spilaranum hér að neðan.
Heimsótti Brim til að kynna sér íslenskan sjávarútveg
Guðmundur tók á móti Kadis hjá Brimi ásamt sendinefnd hans. Hann lýsti sjávarútvegsstjóranum sem viðkunnanlegum manni og sagði heimsóknina fyrst og fremst hafa snúist um að kynna fyrir honum hvernig íslenskur sjávarútvegur hefði þróast undanfarna áratugi.
Starfsemi Brims, vinnslan og skipin vöktu áhuga gestanna og Guðmundur fór yfir hvaða áhrif íslenska fiskveiðistjórnunarkerfið hefði haft á greinina síðustu 40 ár. Kadis hefði hlustað og kynnt sér starfsemina en lítið gefið upp um mögulega stöðu Íslands gagnvart sjávarútvegsstefnu ESB.
Hefur ekkert vald til að lofa undanþágum
Arnþrúður vísaði til fréttaflutnings hér á landi þar sem gefið hefði verið í skyn að Kadis hefði opnað á möguleika Íslands á undanþágum eða sérlausnum í sjávarútvegsmálum.
Guðmundur kannaðist ekki við að slík loforð hefðu verið gefin í heimsókninni til Brims. Kadis væri embættismaður og hefði ekkert umboð til að ákveða hvaða undanþágur Ísland gæti fengið í hugsanlegum aðildarviðræðum.
„Hann hefur ekkert vald til þess, ekki neitt,“ sagði Guðmundur og lýsti hlutverki hans sem sambærilegu við framkvæmdastjóra yfir sjávarútvegsmálum ESB. Hann varaði við að byggja væntingar um niðurstöðu aðildarviðræðna á því sem einstakir embættismenn kynnu að segja eða því sem þeim væri eignað í opinberri umræðu.
Hefði ekki samþykkt makrílsamninginn
Guðmundur var einnig gagnrýninn á nýgerðan makrílsamning Íslands. Kvóti Íslands upp á 12,7% væri ekki endilega ósanngjarn þegar horft væri til veiðanna yfir lengri tíma en önnur atriði samningsins væru mun erfiðari.
Sérstaklega gagnrýndi hann að Ísland þyrfti að láta Norðmenn fá rúmlega 2% gegn aðgangi að norskri lögsögu hvort sem íslensk skip nýttu þann aðgang eða ekki. Þessi skerðing gæti ráðið úrslitum um hvort veiðarnar væru arðbærar.
Fleiri skilyrði hefðu fylgt samningnum sem Guðmundur var ósáttur við. Hann nefndi meðal annars ákvæði um hversu langt íslensk skip þyrftu að sigla inn í norsk svæði og takmarkanir sem vörðuðu makríl í skipunum. Honum fannst íslenska sendinefndin ekki hafa gætt hagsmuna Íslands og íslensks atvinnulífs nægilega vel og sagðist sjálfur aldrei hafa samþykkt samninginn í þessari mynd.
ESB vantar fiskimið
Arnþrúður spurði hvort sama hætta gæti skapast við inngöngu í Evrópusambandið þegar Guðmundur væri þegar ósáttur við hvernig íslensk stjórnvöld gættu hagsmuna landsins í alþjóðlegum sjávarútvegssamningum.
Guðmundur svaraði að sú tilhneiging gæti verið fyrir hendi og nefndi að ESB væri að stækka, þar vantaði mannafla og meiri fjármuni en sambandið hefði ekki mikið af fiskimiðum.
Arnþrúður spurði í kjölfarið hvort Evrópusambandið hefði þá meira að vinna með því að fá Ísland inn en Ísland með inngöngu í sambandið. Guðmundur vildi ekki ganga svo langt og sagðist ekki vilja taka afdráttarlausa afstöðu til þeirrar spurningar að svo stöddu.
Hlusta má á ítarlegri umfjöllun í spilaranum hér að neðan.