Kristján Örn Elíasson ræddi við Björgvin Víglundsson, byggingaverkfræðing og fyrrverandi landsliðsmann í skák, í þættinum Við skákborðið, um nýtt styrkjakerfi íslenskrar skákar. Björgvin gagnrýndi hvernig fjármunum úr Afrekssjóði í skák væri úthlutað og taldi kerfið leggja of mikla áherslu á formleg skilyrði í stað þess að verðlauna raunverulegan árangur. Hlusta má á þáttinn í spilaranum hér að neðan.
Vill að skákin sjálf ráði úthlutun styrkja
Kristján Örn fór yfir breytingarnar sem urðu þegar ný skáklög tóku gildi og útskýrði hvernig Afrekssjóður í skák hefði tekið við af eldra fyrirkomulagi þar sem stórmeistarar nutu sérstakra réttinda. Hann rakti jafnframt hvernig styrkir væru nú veittir bæði afreksskákmönnum og efnilegu skákfólki samkvæmt umsóknum og fyrirfram ákveðnum matsviðmiðum.
Björgvin taldi einfaldara og réttlátara að fjármunirnir færu í verðlaun á sterkum mótum þar sem skákmenn ynnu sér sjálfir inn styrkina með árangri. Með því yrði engin þörf á matsnefndum eða mati á umsóknum heldur réði frammistaðan við skákborðið hverjir fengju mestan stuðning.
Gagnrýnir áherslu á virkni fremur en árangur
Í þættinum var farið yfir hvernig úthlutanir tækju meðal annars mið af heimslistastöðu, virkni og fjölda tefldra kappskáka. Björgvin taldi það geta leitt til þess að skákmenn veldu mót þar sem auðveldara væri að uppfylla skilyrði styrkjakerfisins fremur en að sækja sterkari alþjóðleg mót þar sem meiri möguleikar væru til framfara.
Hann nefndi að sumir væru fyrst og fremst að tryggja sér nægilegan fjölda skáka til að uppfylla skilyrðin en árangurinn sjálfur skipti minna máli en hann ætti að gera.
Telur opinbert fé eiga að skila betri árangri
Kristján Örn fór einnig yfir nýjustu úthlutun Afrekssjóðs í skák, þar sem fram komu upplýsingar um fjölda umsókna, fjárhæðir styrkja og þá skákmenn sem hlutu úthlutun.
Björgvin sagði eðlilegt að gerð væri krafa um að opinbert fjármagn sem rynni til skákar skilaði sýnilegum framförum. Að hans mati sýndu þróun heimslistans og árangur íslenskra skákmanna að tímabært væri að endurskoða hvernig styrkjakerfið væri byggt upp og hvaða árangur því væri ætlað að stuðla að.
Hlusta má á ítarlegri umfjöllun í spilaranum hér að neðan.