Arnþrúður Karlsdóttir ræddi við Jón Pétur Zimsen, þingmann Sjálfstæðisflokksins og fyrrverandi skólastjóra í síðdegisútvarpinu í dag, um slakan lesskilning íslenskra nemenda og áhrif hans á árangur í öðrum námsgreinum. Jón Pétur benti á að margar spurningar í stærðfræði og náttúruvísindum í PISA séu textaþungar og nemandi geti því haft þekkingu til að leysa verkefni en fallið vegna þess að hann skilur ekki hvað spurt er um. Hlusta má á þáttinn í spilaranum hér að neðan.
Lesskilningurinn reynir á fleiri námsgreinar
Jón Pétur sagði ekki hægt að skoða niðurstöður í stærðfræði og náttúruvísindum, án þess að horfa jafnframt á lesskilning. Margar spurningar í þessum greinum byggist á texta sem nemandinn þurfi fyrst að skilja áður en hann geti beitt stærðfræðilegri eða vísindalegri þekkingu sinni. Ef nemandi skilur ekki textann þá getur hann ekki leyst dæmið
Jón Pétur sagði slakan lesskilning íslenskra barna birtast þannig í lakari niðurstöðum í stærðfræði og náttúruvísindum.
Nauðsynlegt að þekkja um 98% orðanna
Orðaforðinn skiptir þar lykilmáli. Jón Pétur sagði að til að skilja innihald texta þyrfti almennt að þekkja um 98% orðanna.
Ef 2 eða 3 lykilorð í stuttum texta væru barninu ókunn gæti það misst samhengi textans og það átt erfitt með að skilja hvað verið væri að spyrja um.
Hann lagði áherslu á að þekking og orðaforði þyrftu að vera til staðar í langtímaminni. Sú hugmynd að ekki þyrfti lengur að muna upplýsingar vegna þess að hægt væri að leita að öllu á netinu væri röng. Fólk þyrfti að búa yfir þekkingu til að geta unnið úr upplýsingum, tekið þátt í samtali og skilið nýtt efni.
Fyrstu 1.000 dagarnir skipta miklu
Jón Pétur lagði einnig mikla áherslu á fyrstu æviár barnsins. Fyrstu 2 til 3 árin eða um fyrstu 1.000 dagarnir, skipti miklu fyrir þróun tungumáls, orðaforða og hugtakaskilnings.
Foreldrar og aðrir sem umgangast ung börn ættu að tala mikið við þau, nota fjölbreyttan orðaforða og lesa fyrir þau daglega. Ekki væri nóg að lesa bókina heldur skipti máli að ræða efnið og orðin við barnið.
Hann sagði orðaforða og hugtakaskilning verða að eins konar innstæðu sem barnið byggi áfram á þegar það eldist. Því meiri þekkingu sem það hefði fyrir, því auðveldara væri að tengja nýja þekkingu við það sem fyrir væri.
Öflugri íslenskukennsla fyrir börn með annað móðurmál
Jón Pétur sagði börn af erlendum uppruna koma sérstaklega illa út í PISA og lagði áherslu á að þau þyrftu öflugri íslenskukennslu. Börn af erlendum uppruna væru nú orðin 30% af grunnskólanemendum á Íslandi og ljós að það yrði að bregðast við þessu.
Barn sem kæmi inn í skólastofu án þess að skilja íslensku væri í erfiðri stöðu en vandinn hefði einnig áhrif á kennarann og aðra nemendur í bekknum.
Jón Pétur vill að þessi börn fái mun markvissari íslenskukennslu svo þau nái betri tökum á tungumálinu og geti tekið fullan þátt í náminu. Tungumálið sé lykillinn að lesskilningi og þar með að námi í öllum öðrum greinum.
Hlusta má á ítarlegri umfjöllun í spilaranum hér að neðan.