Arnþrúður Karlsdóttir ræddi við Dagbjörtu Ósk Steindórsdóttur, stjórnarformann Samtaka aðstandenda og fíknisjúkra og Hörpu Hildiberg Böðvarsdóttur, trúnaðarmann samtakanna í síðdegisútvarpinu um alvarlegar afleiðingar fíknivanda. Báðar eiga þær syni sem eiga við fíknivanda að stríða og hafa komist í kynni við fangelsisvist. Í þættinum var farið ítarlega yfir sögu þeirra og reynslu, ásamt áhrifum á fjölskyldumeðlimi þeirra. Í þættinum lýsti Dagbjört því hvernig sonur hennar varð fyrir skipulögðu og grófu kynrænu ofbeldi af hálfu manna sem eru í mafíu sem starfar á Íslandi í ágúst 2025. Hlusta má á þáttinn í spilaranum hér að neðan.
Tekinn með valdi og neyddur til að greiða mafíunni
Dagbjört sagði að sonur hennar hefði skuldað fíkniefnasölum fjárhæð sem hann gat ekki greitt. Í kjölfarið biðu fjórir menn hans, tóku hann upp í bíl gegn vilja hans og óku með hann um borgina. Þar var hann neyddur til að millifæra alla þá fjármuni sem hann átti inni á bankareikningi sínum á meðan þeir fylgdust með. Að því loknu var honum tilkynnt að skuldin stæði enn og að hann þyrfti að greiða hærri fjárhæð, annars yrði hann beittur frekara ofbeldi. Hótanir sneru meðal annars að því að skaða fjölskyldu hans.
Barinn, misþyrmt og beittur niðurlægjandi ofbeldi
Í frásögn Dagbjartar kom fram að mennirnir hefðu beitt hann ítrekuðu líkamlegu ofbeldi. Hann var sleginn ítrekað og haldið niðri á meðan árásin stóð yfir. Þá var hann beittur niðurlægjandi meðferð þar sem honum var ógnað og hann niðurlægður á meðan á árásinni stóð.
“Mafían skar á kynfæri hans”
Dagbjört lýsti því að þeir hefðu farið með hann að iðnaðarhúsnæði þar sem ætlunin var að beita hann kynferðisofbeldi með líkamlegu samræði. Það hafi mistekist en þess í stað var hann laminn áfram og skaðaður á líkama, meðal annars skáru mennirnir í kynfæri hans. Hann var skilinn eftir illa haldinn, með alvarlega áverka.
Ótti við hefnd hindraði kæru
Eftir árásina fór sonur hennar á sjúkrahús þar sem brugðist var við áverkum hans og allt gert til þess að bæta líðan hans. Dagbjört sagði að þrátt fyrir alvarleika málsins hefði hann ekki þorað að kæra árásina til lögreglu. Ótti við hefndaraðgerðir hafi verið ráðandi, enda hafi honum verið gert ljóst að frekari afleiðingar myndu fylgja ef hann leitaði til yfirvalda. Slíkur ótti sé algengur meðal þeirra sem lenda í viðskiptum við ofbeldisfulla aðila í fíkniefnaumhverfi.
Skuldir og neysla leiddu til tengsla við mafíuna
Aðspurð sagði Dagbjört að sonur hennar hefði fjármagnað neyslu sína með þjófnaði og þar með komist í skuldir sem leiddu til þess að hann komst í samband við þessa aðila. Neyslan hafði þá þróast yfir í notkun margra efna, þar á meðal með sprautum, sem jók enn áhættuna. Eftir árásina versnaði staða hans verulega, hann missti húsnæði sitt og einangraðist frekar. Samhliða því átti hann yfir höfði sér dóm vegna fíkniefnatengdra brota.
Afplánun varð vendipunktur
Dagbjört sagði að sonur hennar hefði að lokum sjálfur leitað eftir því að hefja afplánun þar sem hann taldi það eina leið til að komast út úr aðstæðum sínum. Þar hafi hann náð edrúmennsku og stöðugleika sem hann hefur ekki áður upplifað til lengri tíma.
Hlusta má á ítarlegri umfjöllun í spilaranum hér að neðan.