„Samstaðan“ sem sögð er vera meðal vísindamanna varðandi loftslagsmálin er í raun tilbúin samstaða. Það segir loftslagsvísindamaðurinn Judith Curry í New York Post. Í raun hefur vinstri hugmyndafræði þróast yfir í „iðnað“ með gríðarlegri veltu. „Vísindamennirnir“ sem aðhyllast loftslagsdómsdagskenninguna eru ríkulega verðlaunaðir.
Margir halda því fram, að hin svokallaða loftslagskreppa snúist í raun um stjórnmál og sé tilraun til að snúa heiminum á hvolf út frá hugmyndafræði sósíalismans í stað þess að byggja á vísindum. Margaret Thatcher, fyrrverandi forsætisráðherra Bretlands, varaði við því að loftslagshysterían væri tilraun til að koma á yfirþjóðlegum sósíalisma á heimsvísu. Loftslagsfræðingurinn Judith Curry, útskýrir í viðtali við New York Post, hvernig þetta gerðist.
Var meðhöndluð eins og rokkstjarna
Judith Curry segir meðal annars að fjölmiðlar hafi „elskað hana“ þegar hún birti rannsókn fyrir löngu sem virtist sýna stórkostlega fjölgun fellibylja. Þá fóru loftslagsviðvörunarmenn að tengja öfgakennda veðuratburði við hlýnun jarðar. Curry féll í faðma heimsendamanna og var „meðhöndluð eins og rokkstjarna“ segir hún í New York Post. „Flogið var um allt“ með hana til að hitta stjórnmálamenn. En svo gerðist eitthvað. Aðrir vísindamenn fundu eyður í rannsóknum hennar. Gagnrýnin reyndist rétt, svo hún endurskoðaði málið eins og heiðarlegir vísindamenn gera. Greinarhöfundurinn John Stosel skrifar í New York Post, að það sem opnaði augu hennar var birting „Climategate“ sem afhjúpaði tilraunir ýmissa vísindamanna til að fela gögn sem sýndu fram á, að loftslagsbreytingarnar eru ekkert neyðarástand. Þá skildi Judith Curry að loftslagshysterían er í raun „loftslagsbreytingaiðnaður“ sem snýst um peninga og verðlaunar heimsendavæluskjóður.
Guterres berst gegn kapítalismanum
Samkvæmt Judith Curry kemur þessi loftslagsiðnaður frá Sameinuðu þjóðunum og umhverfisáætlunum þeirra. Hún útskýrir að embættismenn Sameinuðu þjóðanna hafi verið knúnir áfram af hugmyndafræðilegri baráttu gegn kapítalismanum og hafi byrjað að nota loftslagsmálin til að efla hugmyndafræðilega vinstristefnu sína. Árið 1988 var loftslagsnefnd Sameinuðu þjóðanna IPCC stofnuð (Intergovernmental Panel for Climate Change). Curry segir í New York Post:
„IPCC átti ekki að einbeita sér að neinum ávinningi af hlýnun. Umboð IPCC var að leita að hættulegum loftslagsbreytingum af mannavöldum.“
Heimsendahræðslan gefur mestan pening
Vísindamenn komust að því, að það var heimsendahræðslan sem veitti þeim mesta peninga. Það var á þann hátt sem hin „tilbúna samstaða“ varð til í loftslagsmálunum, eins og Judith Curry orðar það – það er að segja „fullyrðingin um að það sé hættuleg alþjóðleg loftslagskreppa í gangi, vegna losunar manna.“ Þetta hefur síðan leitt til þess ástands sem ríkir í dag, segir greinarhöfundur New York Post í grein sinni, nefnilega „stórfellt ríkisfjármagnað heimsendaspákerfi.“