Pétur Gunnlaugsson ræddi við Pál Vilhjálmsson, blaðamann og bloggara í síðdegisútvarpinu á Útvarpi Sögu í dag um stöðu Þorgerðar Katrínar Gunnarsdóttur, utanríkisráðherra eftir niðurstöðu þjóðaratkvæðagreiðslunnar. Páll telur stöðu hennar orðna mjög veika og spáir því að hún verði að lokum færð úr utanríkisráðuneytinu eða hætti í stjórnmálum. Hlusta má á þáttinn í spilaranum hér að neðan.
Tækifærið í Hörpu fór forgörðum
Páll benti á að Þorgerður Katrín, hafi verið með málið í forgangi frá því ríkisstjórnin boðaði þjóðaratkvæðagreiðsluna í mars. Kristrún Frostadóttir hefði að nokkru leyti setið í farþegasætinu á meðan Þorgerður leiddi umræðuna og var helsti talsmaður já-hliðarinnar.
Þegar úrslitin lágu fyrir hefði ríkisstjórnin átt þess kost að viðurkenna niðurstöðuna með skýrum hætti. Páll sagði að ef málið hefði verið tekið af dagskrá og Þorgerður færð úr utanríkisráðuneytinu, hefði ríkisstjórnin getað skapað sér svigrúm til að vinna áfram.
Þess í stað hefði verið reynt að gera lítið úr niðurstöðunni og færa umræðuna yfir á EES-samninginn. Páll telur að með því hafi Þorgerður misst tækifæri til að draga lærdóm af úrslitunum og sættast við þjóðina.
Vantraust gæti komið fram
Hann segir að staða Þorgerðar Katrínar muni halda áfram að veikjast ef hún breytir ekki um stefnu. Vantrauststillaga gæti komið fram en hann býst ekki við henni fyrr en pólitísk staða ráðherrans er orðin það veik að niðurstaðan verði nánast fyrirsjáanleg.
Þrýstingur getur jafnframt aukist innan stjórnarflokkanna og Viðreisnar. Þar hljóti menn að horfast í augu við að þjóðin hafnaði þeirri stefnu sem Þorgerður hafði verið helsti talsmaður fyrir og ríkisstjórnin þurfi að bregðast við niðurstöðunni ætli hún að halda velli.
Ráðuneytisskipti eða brotthvarf úr stjórnmálum
Páll telur líklegast að niðurstaðan verði sú að Þorgerður skipti um ráðuneyti eða hætti í stjórnmálum. Hann á erfitt með að sjá hvernig hún geti haldið áfram óbreytt í utanríkisráðuneytinu eftir úrslit þjóðaratkvæðagreiðslunnar.
Líklegt sé að stjórnarandstaðan muni leggja fram þingsályktunartillögu um að afturkalla aðildarumsókn Íslands að Evrópusambandinu frá 2009. Þá gætu þingmenn stjórnarflokkanna staðið frammi fyrir erfiðri ákvörðun enda yrði atkvæðagreiðsla um slíka tillögu óhjákvæmilega tengd við niðurstöðu þjóðaratkvæðagreiðslunnar.
Páll sagði framtíðarríkisstjórn ávallt geta sótt aftur um aðild að Evrópusambandinu ef pólitískar aðstæður breytast og skýr meirihluti þjóðarinnar vill fara þá leið. Því sé engin ástæða til að halda umsókninni frá 2009 opinni eftir niðurstöðuna.
Hlusta má á ítarlegri umfjöllun í spilaranum hér að neðan.