Starfshópur sem á að endurmeta nálgun íslenskra stjórnvalda í málefnum gervigreindar hefur tekið til starfa. Hlutverk hans er að fara heildstætt yfir stefnu og aðgerðir stjórnvalda á sviðinu og leggja fram tillögur um forgangsröðun og úrbætur í ljósi hraðrar þróunar gervigreindar.
Hópurinn var skipaður að tillögu forsætisráðherra og menningar-, nýsköpunar- og háskólaráðherra og á að skila tillögum sínum fyrir lok september.
Áhersla á samstarf við atvinnulífið
Starfshópnum er einnig ætlað að veita stjórnvöldum ráðgjöf um hvernig styðja megi við uppbyggingu og innleiðingu gervigreindar á Íslandi. Jafnframt á hann að móta tillögur um aukið samstarf hins opinbera og atvinnulífsins um hagnýtingu gervigreindar.
Í hópnum sitja sérfræðingar utan Stjórnarráðsins með reynslu og þekkingu á gervigreind og nýsköpun.
Fimm sérfræðingar skipa hópinn
Formaður starfshópsins er Hjálmar Gíslason, framkvæmdastjóri GRID. Auk hans eiga sæti í hópnum Anna Tumadóttir, framkvæmdastjóri Creative Commons, Ari Kristinn Jónsson, framkvæmdastjóri nýsköpunarsjóðs Atlantshafsbandalagsins, Halldór Fannar Guðjónsson, tæknistjóri hjá NVIDIA, og Lilja Dögg Jónsdóttir, framkvæmdastjóri Almannaróms.
Fulltrúar frá forsætisráðuneytinu og menningar-, nýsköpunar- og háskólaráðuneytinu starfa jafnframt með hópnum.
Byggir á gildandi stefnu stjórnvalda
Skipun starfshópsins byggir á stefnu Íslands um gervigreind og aðgerðaáætlun stjórnvalda á því sviði. Samkvæmt stjórnvöldum er markmiðið að skapa traustan grunn fyrir áframhaldandi þróun og ábyrga nýtingu gervigreindar hér á landi.