Arnþrúður Karlsdóttir ræddi við Jón Bjarnason, fyrrverandi ráðherra og fyrrum rektor Landbúnaðarháskólans á Hólum í Hjaltadal í síðdegisútvarpinu, um ástand bygginga og eigna á Hólum. Jón gagnrýndi harðlega hvernig ríkið hefði staðið að viðhaldi staðarins undanfarin ár og sagði hugmyndir um sölu eigna og húsnæðis á Hólum vekja miklar áhyggjur. Hlusta má á þáttinn í spilaranum hér að neðan.
Byggingar hafa verið látnar drabbast niður
Í viðtalinu sagði Jón, að mörg hús á Hólastað hefðu ekki fengið nauðsynlegt viðhald í áratugi. Hann nefndi að sum skólahúsanna hefðu ekki verið máluð í 35 til 40 ár og ástand þeirra bæri þess skýr merki. Hann sagði að gluggar, þök og tréverk hefðu víða látið á sjá og að byggingarnar „gráti framan í fólk“ þegar komið væri á staðinn. Að hans mati væri þetta bein afleiðing þess að ríkið hefði ekki sinnt eignum sínum þrátt fyrir sögulegt og menningarlegt mikilvægi staðarins.
Jón sagði að ábyrgðin hefði orðið óskýr eftir að stjórnun staðarins var skipt milli stofnana og ráðuneyta. Enginn bæri nú raunverulega heildarábyrgð á staðnum og afleiðingin væri viðhaldsskortur og stöðnun.
Óttast sölu eigna og niðurbrot staðarins
Jón sagði að í frumvarpinu sem nú liggur fyrir Alþingi væri gert ráð fyrir heimildum til sölu á eignum staðarins. Hann sagðist ekki vita hvaða eignir kynnu að verða seldar en taldi það eitt og sér mjög alvarlegt. Hann sagði að sér hrylli við þeirri hugsun að Hólar gætu smám saman verið seldir upp í hlutum eða látnir grotna niður þar til auðveldara yrði að réttlæta sölu eða niðurskurð.
Í viðtalinu nefndi hann einnig að sambærileg þróun hefði orðið eftir að biskupssetrið á Hólum var lagt niður á nítjándu öld. Þá hefði staðurinn farið í mikla hnignun og Hóladómkirkja staðið nánast yfirgefin um tíma.
Gagnrýnir sundraða stjórnsýslu ríkisins
Hann rifjaði upp þegar hann tók við sem skólastjóri árið 1981 hefði ríkið tekið skýra ákvörðun um að byggja Hóla upp. Þá hefði verið ráðist í umfangsmikla enduruppbyggingu þar sem hús voru gerð upp og starfsemin efld með markvissum hætti. Nú væri staðan önnur. Hann sagði að stjórnvöld væru farin að líta á staðinn sem rekstrarvanda í stað þjóðarverðmætis. Þá gagnrýndi hann að málaflokkar sem tengdust Hólum væru dreifðir á milli ráðuneyta og stofnana sem skýrðu að hluta hvers vegna viðhald og uppbygging hefðu setið á hakanum.
Að hans mati þyrfti ríkið að axla beina ábyrgð á Hólum sem menningar- og sögustað í stað þess að ræða sölu eigna og fækkun verkefna.
Hlusta má á ítarlegri umfjöllun í spilaranum hér að neðan.