Kristján Örn Elíasson ræddi við Sveinbjörn Jónsson, Súgfirðing, skákáhugamann og fyrrverandi trillukarl, í þættinum Við skákborðið um tónlistarsköpun hans og notkun gervigreindar. Sveinbjörn semur sjálfur lög og texta en hefur nýtt gervigreindina Suno við útsetningar og flutning og sagði niðurstöðuna í sumum tilvikum betri en það sem hann gæti sjálfur gert. Hlusta má á þáttinn í spilaranum hér að neðan.
Lagið og textinn áfram hans eigin
Í þættinum var spilað lagið „Það er nú það“ sem Sveinbjörn samdi bæði lag og texta við. Hann hafði áður birt lagið á Facebook en ákvað að nota Suno til að gera nýja ábreiðu af því.
Gervigreindin fékk ákveðið frelsi við útsetninguna og sá jafnframt um nýjan söngvara og hljóðfæraleik. Lagið sjálft og textinn voru þó áfram verk Sveinbjörns.
Kristján spurði hvort hann léti Suno þannig sjá um allan flutninginn og hann tók undir það.
Rangur takki varð að nýju lagi
Notkun gervigreindarinnar leiddi einnig til óvæntrar útkomu. Þegar Sveinbjörn ætlaði að láta Suno gera ábreiðu af „Það er nú það“ ýtti hann fyrir mistök á „create“ í stað „cover“.
Úr því varð annað lag. Gervigreindin sleppti orðunum „það er nú það“ úr textanum og vann efnið upp á nýtt. Sveinbjörn nefndi útkomuna „Sálminn um sjálfbærnina“ og sagði lagið ekki síðra en fyrri útgáfuna.
Ný leið til að koma gömlum textum í búning
Gervigreindin hefur einnig verið notuð við annað efni hans. Sveinbjörn þýddi ljóðið „Stefjahreimur“ eftir Einar Benediktsson á ensku, upphaflega til að geta flutt það fyrir enskumælandi gesti í norðurljósaferðum.
Hann hafði sjálfur samið lag við ljóðið en þegar hann lét gervigreind vinna með efnið varð niðurstaðan sú að honum fannst hún gera verkið miklu betur en hann sjálfur.
Sveinbjörn hefur samið fjölda laga og fengið aðstoð annarra við útgáfu þeirra en sagði það geta verið mikið áreiti að þurfa stöðugt að kalla til aðra við framkvæmdina. Gervigreindin hefur því opnað nýja leið til að koma eigin lögum og textum í fullunninn tónlistarbúning.
Hlusta má á ítarlegri umfjöllun í spilaranum hér að neðan.