Það eru landráð og svik við þjóðina verði farsóttarsáttmáli WHO samþykktur af heilbrigðisráðherra. Yfirlýsingar Kára Stefánssonar stangast verulega á í umræðinni um Covid 19. Þetta segir Guðmundur Karl Snæbjörnsson sérfræðingur í heimilislækningum en hann var gestur Arnþrúðar Karlsdóttur í þætti hennar í dag.
Í þættinum var byrjað á að rifja upp ummæli Kára Stefánssonar forstjóra Íslenskrar erfðagreiningar sem á sínum tíma sagði að gera ætti þá óbólusettu útlæga og senda þá til Grímseyjar eða koma þeim fyrir á afskekktum stað. Sami Kári sagði þó á dögunum, í frægu viðtali, að hann ráðlegði engum undir fimmtugu að láta bólusetja sig gegn Covid.
Yfirlýsingar Kára Stefánssonar stangast á
„Kári segir núna að hann myndi ráðleggja fólki undir fimmtugu að þiggja ekki bólusetningu en segir svo að hann myndi engu breyta. Hann segir líka að allar sóttvarnaraðgerðir hafi verið svo góðar án þess að nefna hvað það hafi verið sem hafi verið svona gott við þær“ segir Guðmundur.
Guðmundur segir að allar þessar sóttvarnaraðgerðir hafi í rauninni verið alveg kolklikkaðar og ekki byggðar á neinum vísindum og það ætti Kári að vita sem vísindamaður.
Verðum að ganga úr WHO
Guðmundur Karl segir að á árum áður hafi WHO verið virt stofnun sem hafi unnið göfugt starf. Síðan hafi peningaöflin og lyfjarisarnir tekið völdin og eigi 85% stofnunarinnar. Nú stefni WHO á að hafa ítök í stjórnun landa með farsóttarsáttmálanum. WHO vilji til dæmis með sáttmálanum geta haft hendur í hári einstaklinga og bólusett þá gegn vilja sínum, þrátt fyrir að WHO hafi lýst faraldrinum lokið. Þá sé það inni í sáttmálanum að WHO geti lýst yfir faraldri eftir eigin geðþótta og beitt valdi sínu samkvæmt því.
Hér á landi séu ný sóttvarnarlög fyrirliggjandi á Alþingi sem séu sniðin að því að koma ákvæðum farsóttarsáttmálans inn í íslensk lög og því sé ekkert annað en landráð og svik við þjóðina að ræða, samþykki ráðherra farsóttarsáttmálann fyrir Íslands hönd. Guðmundur Karl vill að Ísland gangi hreinlega úr WHO og í það minnsta að ráðherra grípi inn í og samþykki ekki farsóttarsáttmálann. Willum Þór heilbrigðisráðherra geti stöðvað þetta.
Hér að neðan má hlusta á ítarlegri umfjöllun um fyrirætlanir WHO og hvernig málið tengist Sameinuðu þjóðunum og plönum World Ecconomic Forum um heimsyfirráð og fleira sem málinu tengist.
