Pétur Gunnlaugsson ræddi við Steinunni Gyðu- og Guðjónsdóttur sem skipar 3. sæti lista Samfylkingarinnar í Reykjavík og Guðnýju Maríu Jóhannsdóttur sem skipar 6. sæti lista Sjálfstæðisflokksins í Reykjavík í síðdegisútvarpinu um samgöngumál, Borgarlínu og framtíðarskipulag Reykjavíkur. Þar kom fram að flokkarnir eru mjög ósammála um Borgarlínuna, forgangsröðun í samgönguframkvæmdum og hvernig bregðast eigi við aukinni umferð vegna uppbyggingar nýrra hverfa á höfuðborgarsvæðinu. Hlusta má á þáttinn í spilaranum hér að neðan.
Samfylkingin vill halda áfram með samgöngusáttmálann
Steinunn sagði umferðarteppur og langan ferðatíma milli staða vera eitt stærsta vandamál borgarbúa í daglegu lífi. Hún sagði mikilvægt að ráðast í þær framkvæmdir sem þegar hafi verið samþykktar í samgöngusáttmála ríkis og sveitarfélaga á höfuðborgarsvæðinu, þar á meðal Borgarlínu, Miklubrautargöng, Sæbrautarstokk og framkvæmdir á Arnarnesvegi.
Að hennar mati sé markmiðið ekki að þrengja að einkabílnum heldur að byggja upp raunhæfan valkost með hraðari og áreiðanlegri almenningssamgöngum. Hún sagði nauðsynlegt að undirbúa samgöngukerfið fyrir umfangsmikla íbúðauppbyggingu á Ártúnshöfða, í Keldnalandi og Úlfarsárdal þar sem þúsundir nýrra íbúa muni bætast við á næstu árum.
Steinunn hafnaði því að Samfylkingin styddi hugmyndir um „bíllausa borg“ og sagði flesta í flokknum bæði eiga og nota bifreiðar. Hún sagði hins vegar að Reykjavík þyrfti öflugri almenningssamgöngur til að takast á við framtíðarvöxt borgarinnar.
Sjálfstæðisflokkurinn gagnrýnir kostnað og skipulag
Guðný María sagði að margir kjósendur sem hún ræddi við væru efins um Borgarlínuna og teldu verkefnið bæði of kostnaðarsamt og óljóst hvernig notkun þess yrði. Hún sagði að fólk hefði áhyggjur af vegtollum eða tafagjöldum og efaðist um að Borgarlínan myndi breyta ferðavenjum í landi þar sem veðurfar hefði mikil áhrif á samgöngur. Hún sagði Sjálfstæðisflokkinn vilja bæta núverandi strætókerfi með sérakreinum fyrir vagna, fremur en ráðast í jafn umfangsmiklar framkvæmdir. Einnig sagði hún mikilvægt að nýta betur gögn og tæknilausnir til að bæta flæði umferðar.
Guðný María gagnrýndi einnig að ný hverfi væru skipulögð með færri bílastæðum áður en fullnægjandi almenningssamgöngur væru komnar til staðar. Hún sagði þrengingar á Suðurlandsbraut geta aukið álag á íbúðagötur í nærliggjandi hverfum og haft neikvæð áhrif á fyrirtæki á svæðinu.
Áhyggjur af framkvæmdum á Suðurlandsbraut
Í umræðunni kom fram að báðar teldu mikilvægt að bæta samráð við fyrirtæki sem verða fyrir áhrifum framkvæmda vegna Borgarlínu. Steinunn sagði framkvæmdatíma og skipulag framkvæmda hafa valdið fyrirtækjum áhyggjum og mikilvægt væri að koma í veg fyrir langvarandi lokanir gatna og óskipulagðar framkvæmdir. Hún sagði þó að til lengri tíma gætu fasteignir og atvinnustarfsemi við helstu samgönguása styrkst þegar almenningssamgöngur yrðu orðnar skilvirkari.
Guðný María sagði hins vegar að núverandi útfærsla gæti dregið úr aðgengi að fyrirtækjum ef bílastæðum yrði fækkað verulega og umferð þrengd án þess að raunhæfir valkostir væru tilbúnir.
Hlusta má á ítarlegri umfjöllun í spilaranum hér að neðan.