Arnþrúður Karlsdóttir ræddi við Guðmund Ólafsson, hagfræðing og stærðfræðing í síðdegisútvarpinu í dag, um pólitískar afleiðingar niðurstöðu þjóðaratkvæðagreiðslunnar. Guðmundur sagði Þorgerði Katrínu Gunnarsdóttur utanríkisráðherra bera mesta ábyrgð á því að málið var knúið áfram og sagði stöðuna geta leitt til þess að hún þurfi að segja af sér ráðherraembætti. Hlusta má á þáttinn í spilaranum hér að neðan.
Lagði stjórnarsamstarfið að veði
Guðmundur sagði forystumenn ríkisstjórnarinnar hafa farið of geyst í málið en Þorgerður Katrín bæri mesta ábyrgð. Hún hefði knúið málið áfram af mikilli hörku og lagt stjórnarsamstarfið að veði.
Kristrún Frostadóttir forsætisráðherra hefði þá staðið frammi fyrir því að fara í kosningar eða leita annarra leiða við stjórnarmyndun og látið til leiðast. Guðmundur sagði Kristrúnu lítið hafa tekið þátt í baráttunni í upphafi og taldi hana hafa ætlað að einbeita sér að efnahagsmálum eins og hún hafði boðað fyrir síðustu Alþingiskosningar.
Hann sagði skoðanakannanir jafnframt kunna að hafa haft áhrif á ákvörðunina. Maður sem starfar við skoðanakannanir hefði sagt honum að um hálfu ári fyrr, hefði stuðningur við aðildarferlið mælst 25% meiri en andstaðan. Guðmundur taldi líklegt að forystumenn ríkisstjórnarinnar hefðu haft sambærilegar upplýsingar og talið sigur auðveldan.
Neitar að afturkalla umsóknina frá 2009
Guðmundur sagði erfitt fyrir ráðherra að vinna úr því að tapa jafn mikilvægu máli í þjóðaratkvæðagreiðslu. Hann sagði jafnframt að Þorgerður Katrín virtist neita að afturkalla umsókn Íslands um aðild að Evrópusambandinu frá 2009.
Ef sú verður niðurstaðan sagði Guðmundur, Alþingi þurfa að taka málið fyrir og greiða um það atkvæði. Slík atburðarás gæti að hans sögn leitt til þess að Þorgerður Katrín þurfi að segja af sér ráðherraembætti.
Vantraust komið inn í umræðuna
Arnþrúður spurði Guðmund hvort hann hefði tekið eftir því að vantraust á ráðherra hefði verið nefnt í tengslum við stöðuna.
Guðmundur svaraði því játandi og sagði það geta bent til þess að þeim möguleika verði beitt síðar. Staða utanríkisráðherra eftir niðurstöðu þjóðaratkvæðagreiðslunnar væri því að hans mati erfið, sérstaklega ef ekki verður fallið frá umsókninni frá 2009.
Hlusta má á ítarlegri umfjöllun í spilaranum hér að neðan.