Rúnar Þór ræddi við Þóri Baldursson, tónlistarmann, í þættinum Slappaðu af, um tónleika sem Þórir heldur í Austurbæjarbíói 16. október. Þar ætlar Þórir ásamt Gömmum og fjölmennum hópi söngvara og hljóðfæraleikara að flytja tónlist sem hann hefur unnið að undanfarin misseri. Um er að ræða einu tónleikana sem fyrirhugaðir eru. Hlusta má á þáttinn í spilaranum hér að neðan. Þórir hefur sjaldan haldið tónleika undir eigin nafni þrátt fyrir áratugalangan feril. Hann sagði að vinnan við útsetningar og upptökur hefði lengst af snúist um verkefni fyrir aðra en nú væri hann loksins að gera verkefni fyrir sjálfan sig.
Gömul lög fengu nýtt líf
Undanfarið hefur Þórir unnið að því að endurvekja tónlist sem hann samdi fyrir áratugum. Hann fór í gegnum kassa af gömlum kassettum og demóupptökum og fann þar mikið magn af efni. Úr varð listi með 20–30 lögum sem hann og Gammar hafa tekið upp að nýju. Stór hluti laganna er hljóðfæratónlist.
Hluti efnisins varð til þegar Þórir bjó í Bandaríkjunum á árunum 1986 til 1990. Félagar hans frá San Francisco sömdu texta og unnu þeir saman að R&B-tónlist í anda níunda áratugarins. Þórir færði gömlu upptökurnar yfir á stafrænt form og skrifaði tónlistina upp fyrir hljóðfæraleikarana.
Fjölmennur hópur kemur fram
Gammar skipa auk Þóris þeir Stefán S. Stefánsson á saxófón, Björn Thoroddsen á gítar, Bjarni Sveinbjörnsson á bassa og Sigfús Óttarsson á trommur. Fyrir hlé flytur hljómsveitin blandað efni en eftir hlé bætast fleiri tónlistarmenn og söngvarar í hópinn.
Einar Scheving verður á slagverk og Pálmi Sigurhjartarson á píanó og hljómborð. Þórir verður sjálfur á orgeli. Meðal söngvara verða Geir Ólafsson, Kjalar Marteinsson Kollmar, Stefanía Svavarsdóttir og Una Stefánsdóttir.
Þórir lýsti seinni hluta tónleikanna sem ferð aftur til níunda áratugarins. Þar verða flutt lög sem hann samdi fyrir 30–40 árum og sækja meðal annars í diskó og R&B þess tíma.
„Leyndarmál“ og „Brúðarskórnir“
Þórir ætlar sjálfur að syngja lagið „Leyndarmál“ í nýrri útsetningu. Tónleikunum lýkur síðan með „Brúðarskónum“ þar sem söngvararnir og bakraddirnar koma saman.
Bakraddir syngja Íris Lind Verudóttir, Ragna Björg Ársælsdóttir og Arna Rún Ómarsdóttir. Þær komu einnig að nýjum upptökum laganna.
Þórir fékk styrki frá Menningarsjóði FÍH og Upptökusjóði STEFs til verkefnisins. Hann sagði tónleikana vera leið til að sýna afrakstur vinnunnar.
Tónleikarnir verða jafnframt hljóðritaðir. Bjarni Bragi Kjartansson annast hljóðstjórn og upptöku en Þórir hefur starfað við tónlist frá 14 ára aldri og segir ferilinn nú orðinn 68 ár.
Hlusta má á ítarlegri umfjöllun í spilaranum hér að neðan.