Arnþrúður Karlsdóttir ræddi við Herbert Guðmundsson, tónlistarmann í síðdegisútvarpinu, um hvernig lög hans hefðu fylgt fólki á mikilvægustu stundum lífsins. Herbert sagði sífellt algengara að hann væri fenginn til að koma fram í afmælum og brúðkaupum en hann hefði einnig sungið við útfarir þar sem tónlistin fengi allt aðra og dýpri merkingu. Hlusta má á þáttinn í spilaranum hér að neðan.
Herbert í afmælisgjöf
Herbert greindi frá því að hann hefði nýlega komið fram í afmæli áttræðs manns sem óskaði sérstaklega eftir því að fá Herbert í afmælislgjöf. Arnþrúður spurði hvort algengt væri að fólk fengi tónlistarmann í afmælisgjöf. Herbert svaraði því játandi og sagðist oft koma fram sem óvænt gjöf frá fjölskyldum afmælisbarna.
Herbert sagðist líta á slíkar beiðnir sem mikinn heiður. Tónlistin gæti breytt stemningunni á skömmum tíma en fólk sem sæti við borðin stæði skyndilega upp og tæki þátt í gleðinni.
Ástarlögin vinsæl í brúðkaupum
Brúðkaup væru einnig stór hluti af dagskrá Herberts. Lög á borð við „Can’t Walk Away“, „Eilíf ást“, „Svaraðu“ og „Í þér býr það besta“ væru oft pöntuð sérstaklega fyrir brúðhjón.
Herbert sagði brúðir meðal annars hafa óskað eftir því að hann flytti „Can’t Walk Away“ fyrir eiginmenn þeirra. Lagið hefði fylgt mörgum samböndum allt frá útgáfu þess árið 1985 og sum hjón tengdu það við fyrstu kynni sín eða upphaf sambandsins.
Hann hefði einnig fengið sögur frá fólki sem dansaði við lagið á sínum tíma og væri enn saman rúmum 40 árum síðar með börn og barnabörn. Slíkar frásagnir sýndu hvernig lög gætu varðveitt minningar um ákveðin augnablik í lífi fólks.
Söng við útför 19 ára pilts
Herbert sagðist aðeins hafa sungið við 3 útfarir á ferlinum. Nýlega hefði hann komið fram við sérstaklega sorglega útför 19 ára pilts sem tók eigið líf og hafði verið mikill aðdáandi hans.
Aðspurður hvaða lög hann hefði flutt nefndi Herbert „Fæðumst til að deyja“ sem kom út á fyrstu sólóplötu hans árið 1977. Textinn fjallaði um þá óumflýjanlegu staðreynd að lífinu lyki hjá öllum og hefði því fengið djúpa merkingu við þessar aðstæður. Hann flutti 2 lög við útförina.
Lögin geta styrkt fólk
Herbert sagði tónlist sína einnig hafa verið notaða til að styðja fólk á erfiðum tímum. Hann hefði komið fram fyrir þátttakendur í endurhæfingu hjá VIRK sem glímdu meðal annars við kulnun.
Þar hefði hann sagt sögu sína og flutt nokkur lög, þar á meðal „Í þér býr það besta“. Hann hefði séð hvaða áhrif boðskapur lagsins hafði á fólk sem væri vant að tala sig niður eða hefði misst trú á eigin getu.
Herbert sagði tónlistina geta kallað fram gleði, sorg og persónulegar minningar. Það væri honum mikil blessun að lögin skyldu fylgja fólki jafnt í brúðkaupum og afmælum sem á erfiðustu stundum lífsins.
Hlusta má á ítarlegri umfjöllun í spilaranum hér að neðan.