Pétur Gunnlaugsson ræddi við Ólaf Adolfsson, þingmann Sjálfstæðisflokksins í síðdegisútvarpinu um varnar- og öryggismál Íslands, tengsl þeirra við Evrópusambandsumræðuna og áhrif mögulegrar aðildar á orkumál. Ólafur sagði Ísland eiga fyrst og fremst að treysta á varnarsamninginn við Bandaríkin og taldi ekki að breytt öryggisstaða í Evrópu breytti þeirri meginforsendu. Hann sagði jafnframt að ákvörðunarvald yfir íslenskum orkulindum ætti áfram að vera í höndum Alþingis. Hlusta má á þáttinn í spilaranum hér að neðan.
Vill efla varnarsamstarfið við Bandaríkin
Pétur spurði hvort aukin spenna í samskiptum Bandaríkjanna og Evrópu styrkti rök fyrir því að Ísland tengdist Evrópusambandinu nánar á sviði varnarmála. Ólafur svaraði því til að þróunin sýndi fremur mikilvægi þess að efla varnarsamstarfið við Bandaríkin, enda byggði öryggi Íslands á varnarsamningnum frá 1951.
Ólafur sagði rétt að efla samstarf við Evrópuríki og sérstaklega Norðurlönd um sameiginlega hagsmuni svo sem vernd mikilvægra innviða og fjarskiptakerfa en taldi það ekki koma í stað þeirrar öryggistryggingar sem varnarsamstarfið við Bandaríkin veitti. Aðspurður um umræður um mögulega brotthvarf Bandaríkjanna úr NATO sagði hann líta á slíkt sem vangaveltur fremur en raunhæfa þróun. Hann benti jafnframt á að Bandaríkin hefðu ítrekað kallað eftir því að Evrópuríkin bæru stærri hluta af kostnaði við eigin varnir.
Segir orkuauðlindirnar eiga að vera á forræði Alþingis
Þegar umræðan beindist að orkumálum spurði Pétur hvaða áhrif aðild að Evrópusambandinu gæti haft á nýtingu íslenskra orkulinda. Ólafur sagði sinn skilning vera þann að ákvörðun um að leggja sæstreng til útflutnings raforku yrði áfram í höndum Alþingis og ekkert yrði gert án samþykkis íslenskra stjórnvalda.
Þeir ræddu einnig 3ja orkupakkann og þróun raforkumarkaðarins. Ólafur sagði markmið breytinganna hafa verið að auka samkeppni, en benti á að flutningskostnaður hefði hækkað verulega þótt samkeppni hefði aukist á einstökum sviðum markaðarins.
Að lokum lagði hann áherslu á að orkuauðlindir landsins væru meðal mikilvægustu hagsmunamála þjóðarinnar og að allar ákvarðanir um nýtingu þeirra yrðu áfram teknar hér á landi, óháð umræðum um mögulega aðild Íslands að Evrópusambandinu.
Hlusta má á ítarlegri umfjöllun í spilaranum hér að neðan.