Tveir karlmenn voru í dag úrskurðaðir í gæsluvarðhald í Héraðsdómi Reykjaness vegna rannsóknar lögreglunnar á höfuðborgarsvæðinu á andláti manns í Kópavogi í gær. Þetta kemur fram í tilkynningu frá lögreglu.
Gæsluvarðhaldið er á grundvelli rannsóknarhagsmuna. Annar mannanna verður í gæsluvarðhaldi til 21. ágúst en hinn til 17. ágúst. Annar þeirra er íslenskur ríkisborgari en hinn erlendur ríkisborgari.
Lést á Landspítalanum
Lögreglu var tilkynnt um alvarlega líkamsárás í heimahúsi í Kópavogi um miðjan dag í gær. Maðurinn sem varð fyrir árásinni var fluttur á Landspítalann þar sem hann lést síðdegis.
Hinn látni var erlendur ríkisborgari á fimmtugsaldri.
Rannsókn málsins heldur áfram
Lögreglan á höfuðborgarsvæðinu rannsakar tildrög andlátsins en segir ekki unnt að veita frekari upplýsingar um málið að svo stöddu.