Úkraína og Ísland ætla að hraða undirbúningi samkomulags um samstarf á sviði ómannaðra loftfara og annarra ómannaðra varnarkerfa. Andrii Sybiha utanríkisráðherra Úkraínu ræddi málið við Þorgerði Katrínu Gunnarsdóttur utanríkisráðherra á Íslandi á leið sinni til New York þar sem allsherjarþing Sameinuðu þjóðanna fer fram. Þetta kemur fram í úkraínska fjölmiðlinum Unn.
Þetta var fyrsta tvíhliða heimsókn Sybiha til Íslands samkvæmt úkraínska utanríkisráðuneytinu. Hann millilenti hér á landi á leið sinni á fundaviku leiðtoga á allsherjarþingi Sameinuðu þjóðanna.
Ráðherrarnir samþykktu að hraða undirbúningi samkomulags Íslands og Úkraínu um samstarf á sviði ómannaðra varnarkerfa.
Úkraína tilbúin að miðla reynslu sinni
Sybiha sagði Úkraínu reiðubúna að miðla þeirri reynslu sem landið hefur aflað sér af notkun dróna og vörnum gegn þeim í stríðinu við Rússland.
Sérstaklega nefndi hann reynslu Úkraínumanna af því að verja mikilvæga innviði. Rússar hafa ítrekað beint dróna- og eldflaugaárásum að orkumannvirkjum og öðrum mikilvægum innviðum landsins.
Sybiha upplýsti Þorgerði Katrínu jafnframt um stöðuna í Úkraínu, árásir Rússa, stöðuna á Svartahafi og tilraunir til að ná friði.
Samræmdu afstöðu fyrir allsherjarþing SÞ
Utanríkisráðherrarnir ræddu einnig helstu alþjóðamál fyrir fundaviku allsherjarþings Sameinuðu þjóðanna.
Samkvæmt úkraínska utanríkisráðuneytinu var sérstök áhersla lögð á það sem stjórnvöld í Kænugarði kalla aðgerðir Rússa til að grafa undan stöðugleika í Evrópu og hvernig bregðast megi við þeim.
Þá ræddu ráðherrarnir um aukið samstarf Úkraínu við Sameiginlega viðbragðssveitina, JEF, sem Bretland leiðir og Ísland á aðild að.
Orkuöryggi Úkraínu fyrir veturinn
Orkuöryggi Úkraínu fyrir komandi vetur var einnig til umræðu. Sybiha þakkaði Íslandi fyrir áframhaldandi stuðning við Úkraínu og fyrir afstöðu íslenskra stjórnvalda í stríðinu.
Fundurinn kemur skömmu eftir að Volodymyr Zelensky Úkraínuforseti hitti Þorgerði Katrínu þegar hann átti leið um Ísland fyrr í september á leið til Kanada.
Þá var meðal annars rætt um undirbúning Úkraínu fyrir veturinn, varnir orkuinnviða og styrkingu loftvarna landsins.