Pétur Gunnlaugsson ræddi við Kjartan Magnússon, stjórnarmann í Ung gegn ESB, (Xnei.is) í síðdegisútvarpinu um þróun varnarsamstarfs Evrópusambandsins og hvort breytt öryggisstaða í Evrópu væri rök fyrir því að Ísland gengi í sambandið. Kjartan sagði að óvissa um framtíð varnarsamstarfs ESB og sterk staða varnarsamnings Íslands við Bandaríkin mæltu frekar með því að Ísland héldi núverandi stefnu. Hlusta má á þáttinn í spilaranum hér að neðan.
Evrópskt varnarsamstarf enn í mótun
Benti Kjartan á að víða í Evrópu færi fram umræða um aukna samþættingu í varnarmálum og mögulega uppbyggingu sameiginlegrar varnargetu. Hann taldi þó að slíkt samstarf væri enn á þróunarstigi og langt væri í að Evrópa hefði byggt upp sjálfstæða hernaðarlega getu sem jafnaðist á við þá sem Bandaríkin veittu innan Atlantshafsbandalagsins.
Að hans mati væri því ekki tímabært fyrir Ísland að byggja öryggisstefnu sína á ómótaðri þróun innan Evrópusambandsins.
Varnarsamningurinn við Bandaríkin skipti áfram mestu
Kjartan benti á að Ísland nyti nú þegar varnarsamstarfs við Bandaríkin og sagði það hafa verið hornstein íslenskrar öryggisstefnu um áratugaskeið. Hann taldi ekki skynsamlegt að Ísland tæki afstöðu í aukinni spennu milli Evrópu og Bandaríkjanna heldur héldi áfram nánu samstarfi við báða aðila þar sem hagsmunir landsins væru best tryggðir með stöðugum samskiptum.
Hann sagði jafnframt að lítið ríki eins og Ísland ætti almennt að gæta varfærni í alþjóðamálum og forðast að binda sig við hugmyndafræðilegar línur í deilum stórvelda.
Kostnaður og auknar skuldbindingar
Í viðtalinu var einnig rætt um fjárhagslegar afleiðingar aukinnar samþættingar Evrópusambandsins í varnarmálum. Kjartan sagði að fyrirhuguð aukning útgjalda til sameiginlegra varnarmála gæti leitt til verulegra fjárhagslegra skuldbindinga fyrir aðildarríki. Hann taldi því að kjósendur þyrftu ekki aðeins að horfa til öryggissjónarmiða heldur einnig þeirra kostnaðar sem gæti fylgt frekari samþættingu Evrópusambandsins.
Hlusta má á ítarlegri umfjöllun í spilaranum hér að neðan.