Vaxtahækkanir Seðlanbanka Íslands í vikunni eyðilögðu forsendur kjaraviðræðna VR við Samtök atvinnulífsins og því ekki forsendur fyrir áframhaldandi viðræðum að mati VR.
Í tilkynningu sem VR sendi frá sér í morgun segir meðal annars að Viðræður hafi verið að þokast í rétta átt síðustu daga en nú sé ljóst að forsendur fyrir áframhaldandi samtali eru brostnar. Ákvörðun Seðlabanka Íslands um að hækka stýrivexti í 6%, hafi sett viðræður í uppnám og tilboð SA um launahækkanir hingað til standa engan veginn undir hækkunum verðlags og vaxta sem dunið hafa á launafólki í landinu. Þá eru frekari hækkanir nú fyrirsjáanlegar að mati VR.
Þá segir að viðræðunefnd VR hafi ekki skynjað nokkurn vilja hjá samninganefnd SA um að hækka sitt tilboð frá því sem boðið var þegar deilunni var vísað til Ríkissáttasemjara og því enginn sjáanlegur tilgangur í því að halda viðræðum áfram að óbreyttu.
Yfirlýsing um árangursleysi viðræðna felur í sér að VR mun nú kynna ákvörðunina fyrir félagsfólki og meta næstu skref. Samkvæmt lögum ber ríkissáttasemjara að gera tilraun til að ná sáttum ef annar aðili óskar þess eða sáttasemjari telur það heppilegt. Ríkissáttasemjara ber þó ætíð að leita sátta innan 14 sólarhringa frá síðustu samningatilraunum
