Vegagerðin varar vegfarendur við mjög slæmu veðri víða um land á morgun, miðvikudag. Spáð er allt að ofsaveðri á Vestfjörðum og utanverðu Snæfellsnesi, auk mikillar snjókomu og hríðarveðurs á fjallvegum. Þá er varað við mjög hvössum vindi undir Eyjafjöllum, í Mýrdal og Öræfum snemma í fyrramálið.
Samkvæmt upplýsingum Vegagerðarinnar verður mjög hvasst undir Eyjafjöllum, í Mýrdal og Öræfum frá því snemma í fyrramálið og fram til um klukkan níu.
Um svipað leyti tekur veðrið að versna verulega á norðvestanverðu landinu, þar sem spáð er norðaustanátt, allt að ofsaveðri, á Vestfjörðum og utanverðu Snæfellsnesi. Búist er við að óveðrið standi yfir allan daginn og fram á kvöld.
Mikil snjókoma og hríðarveður á fjallvegum
Vegagerðin varar sérstaklega við mikilli snjókomu og hríðarveðri á fjallvegum á þeim svæðum þar sem veðrið verður verst. Aðstæður til aksturs geta því orðið mjög erfiðar, einkum á Vestfjörðum og Snæfellsnesi.
Jaðar óveðursins verður samkvæmt spánni um Dali og utanverðan Skagafjörð og er gert ráð fyrir að skilin milli veðursvæða verði mjög skörp.
Sunnan við þessi skil verður veðrið mun skaplegra, þótt mjög hvassir vindar geti orðið á afmörkuðum svæðum sunnanlands snemma dags.
Vegfarendur eru hvattir til að taka mið af viðvörun Vegagerðarinnar og fylgjast með veðurspám og færð áður en lagt er af stað.