Kristján Örn Elíasson ræddi við Helga Áss Grétarsson, stórmeistara í skák í þættinum, Við skákborðið um árangur Vignis Vatnar Stefánssonar á Evrópumeistaramóti einstaklinga í skák sem fram fór í Katowice í Póllandi. Í viðtalinu kom fram að Vignir hefði verið í hópi efstu keppenda mótsins og tryggt sér þátttökurétt á heimsbikarmóti Alþjóðaskáksambandsins FIDE. Hlusta má á þáttinn í spilaranum hér að neðan.
Sterk frammistaða á einu erfiðasta móti Evrópu
Helgi Áss sagði Evrópumeistaramót einstaklinga vera eitt erfiðasta opna mót Evrópu þar sem margar af sterkustu stórmeistarastjörnum álfunnar tækju þátt. Vignir Vatnar hafi staðið sig afar vel og endað með 8 vinninga af 11 mögulegum. Hann sagði að Vignir hefði um tíma verið efstur í mótinu eftir 6 umferðir og það eitt sýndi hversu sterkt mótið hefði verið. Að lokum hafnaði hann í sæti sem nægði til þess að tryggja honum þátttökurétt á heimsbikarmótinu.
Helgi Áss benti á að Vignir væri aðeins 23 ára gamall og hefði alla burði til að verða enn sterkari skákmaður á næstu árum. Hann sagði að þróun hans undanfarin misseri hefði verið mjög jákvæð og að erfitt væri orðið fyrir sterka stórmeistara að vinna hann.
Áhersla á faglegan undirbúning
Í viðtalinu kom fram að Vignir hefði lagt mikla áherslu á faglegan undirbúning fyrir mót. Helgi Áss nefndi sérstaklega samstarf hans við Birki Ísak sem aðstoðar við skákbyrjanir og skipulagðan undirbúning fyrir einstakar skákir.
Hann sagði að Vignir hefði einnig verið ötull við að byggja upp eigið vörumerki með skákmótahaldi, kennslu og starfsemi á netinu. Að mati Helga Áss væri það mikilvægt fyrir atvinnumenn í skák að geta sameinað keppni og atvinnustarfsemi.
Helgi Áss sagði jafnframt að íslenska skákhreyfingin þyrfti að styðja vel við bakið á Vigni fyrir heimsbikarmótið þar sem það gæti orðið stórt skref á ferli hans. Hann taldi að góður árangur þar gæti aukið sjálfstraust hans enn frekar og opnað ný tækifæri á alþjóðlegum vettvangi.
Hlusta má á ítarlegri umfjöllun í spilaranum hér að neðan.