Arnþrúður Karlsdóttir ræddi við Hauk Andreasson, oddvita Sjálfstæðisflokks og óháðra í Suðurnesjabæ í síðdegisútvarpinu um tekjur sveitarfélagsins af NATO-mannvirkjum, breytingar á Jöfnunarsjóði sveitarfélaga og uppbyggingu grænna iðngarða við Helguvík og Bergvík. Í viðtalinu kom fram að framboðið vilji bæði fá auknar tekjur vegna varnarmannvirkja innan bæjarmarka og hraða nýrri atvinnuuppbyggingu sem tengist hátækni, matvælaframleiðslu og nýsköpun. Hlusta má á þáttinn í spilaranum hér að neðan.
Vilja leiðréttingu vegna NATO-bygginga
Haukur sagði að stór hluti varnarmannvirkja NATO innan bæjarmarka Suðurnesjabæjar væri undanþeginn fasteignagjöldum samkvæmt varnarsamningum Íslands. Að hans mati skapaði það verulegan tekjumissi fyrir sveitarfélagið þar sem bæjarfélagið bæri ábyrgð á skipulagi og innviðum án þess að fá hefðbundnar tekjur af mannvirkjunum. Hann sagði að breytingar á útreikningum Jöfnunarsjóðs sveitarfélaga hefðu jafnframt haft neikvæð áhrif á fjárhag sveitarfélagsins þar sem fasteignagjöld væru nú tekin inn í útreikninga sjóðsins. Það hefði lækkað framlög til Suðurnesjabæjar umtalsvert, þrátt fyrir að stór hluti mannvirkja innan bæjarmarka bæjarins greiddi engin fasteignagjöld.
Um væri að ræða réttlætismál fyrir sveitarfélög á Suðurnesjum sem hýstu varnarmannvirki og þjónustu tengda NATO.
Grænir iðngarðar og ný atvinnusvæði
Í viðtalinu kom einnig fram að mikil uppbygging væri hafin í svokölluðum grænum iðngörðum á svæðinu, þar sem áður stóð til að reisa álver. Þar væri nú unnið að verkefnum sem tengdust hringrásarhagkerfi, ræktun og hátæknistarfsemi. Haukur nefndi meðal annars ræktun japanskra jarðarberja og aðra matvælaframleiðslu sem þegar væri hafin á svæðinu. Þá væri einnig horft til þess að laða að alþjóðleg tæknifyrirtæki og ný verkefni sem gætu nýtt orku, innviði og nálægð við flugvöllinn.
Vilja tengja atvinnulíf og verknám við Fjölbrautarskóla Suðurnesja
Haukur sagði jafnframt að tækifæri fælust í að tengja grænu iðngarðana betur við Fjölbrautaskóla Suðurnesja. Hann taldi að hluti verknáms gæti farið fram innan iðngarðanna þar sem aðstaða væri fyrir hendi til verklegrar kennslu og framleiðslu. Hann segir að slíkt bæði styrki iðnmenntun á Suðurnesjum og flýtt fyrir uppbyggingu nýrra atvinnugreina á svæðinu. Hann sagði sveitarfélagið standa frammi fyrir stórum tækifærum í hátækni, nýsköpun og grænum iðnaði sem gætu breytt atvinnulífi Suðurnesja á næstu árum.
Hlusta má á ítarlegri umfjöllun í spilaranum hér að neðan.