Vísindamenn í Bretlandi vinna nú að þróun bóluefnis gegn Hantaveiru eftir að banvænn faraldur um borð í skemmtiferðaskipinu MV Hondius vakti upp áhyggjur af nýjum veirum sem ekki sé til lækning við né samþykkt bóluefni. Fjallað er um málið á Euronews.
Segja enga lækningu eða bóluefni til staðar
Faraldurinn um borð í hollenska skipinu MV Hondius tengist Andes-afbrigði Hantaveiru sem sagt er eitt hættulegasta afbrigði veirunnar og getur í sjaldgæfum tilvikum borist milli manna. Fram hefur komið að þrír hafi látist í tengslum við smitin og fleiri veikst. Sem stendur eru hvorki til samþykkt bóluefni né sérhæfð meðferð gegn Hantaveiru, þó heilbrigðisyfirvöld segi snemmbæra læknisaðstoð geta aukið lífslíkur sjúklinga.
Bretar höfðu þegar hafið þróun bóluefnis
Rannsakendur við Háskólann í Bath höfðu áður hafið þróun nýs mRNA-bóluefnis gegn öðru afbrigði veirunnar sem kallast Hantaan-veira áður en faraldurinn á MV Hondius hófst. Rannsóknarteymið segir fyrstu dýratilraunir hafa sýnt jákvæðar niðurstöður.
Vonast til að tæknin virki einnig gegn Andes-afbrigðinu
Vísindamennirnir segja nú næsta skref vera að kanna hvort sama bóluefnistækni geti einnig virkað gegn Andes-afbrigðinu sem olli smitunum á skemmtiferðaskipinu. Þeir vara þó við því að enn sé of snemmt að fullyrða hvort bóluefnið muni vernda gegn þeirri tegund.
Segja nýja tækni geta auðveldað dreifingu bóluefna
Breska ríkisstjórnin veitti verkefninu styrk árið 2024 til þróunar á því sem gæti orðið fyrsta hitastöðuga mRNA-bóluefni heims gegn Hantaan-veirunni.
Bóluefnið byggir á nýrri tækni sem kallast „ensilication“ og gæti gert kleift að geyma og flytja bóluefnið við mun hærra hitastig en hefðbundin mRNA-bóluefni.
Vonast til að sleppa djúpfrystingu
Rannsakendur segja tæknina þegar hafa gert kleift að færa geymslu bóluefnisins úr -70 gráðum yfir í venjulegan kælihita á bilinu 2 til 8 gráður. Markmiðið sé að hægt verði að flytja slík bóluefni við stofuhita í framtíðinni sem gæti auðveldað dreifingu þeirra verulega um heim allan.
Tortryggni gagnvart nýjum bóluefnum
Þróun nýs Hantaveirubóluefnis hefur jafnframt vakið umræðu og tortryggni meðal margra í ljósi reynslunnar af bóluefnum gegn Covid-19. Gagnrýnendur hafa bent á að traust almennings til heilbrigðisyfirvalda og lyfjafyrirtækja hafi veikst víða eftir faraldurinn og að margir séu orðnir varfærnari gagnvart nýjum mRNA-bóluefnum og hraðri þróun þeirra.
WHO hefur hins vegar haldið því fram að þróun nýrra bóluefna sé nauðsynleg til að bregðast við mögulegum farsóttum framtíðarinnar