Aðalþing Hringborðs Norðurslóða – Arctic Circle hefst í Hörpu á morgun, 8. október, þar sem málefni Norðurslóða verða rædd í samhengi við breytta heimsmynd, öryggismál, viðskipti, vísindi og vaxandi valdatafl stórveldanna. Rúmlega 2.000 þátttakendur frá um 70 löndum sækja þingið sem stendur til laugardagskvölds 10. október. Um 200 málstofur verða haldnar og ræðumenn verða um 700, auk fjölmargra annarra viðburða.
Arctic Circle er stærsta alþjóðlega samkoman sem sérstaklega er helguð hagsmunum og breytingum á Norðurslóðum. Bandaríkin, Grænland, Kanada, Evrópusambandið og Kína verða sérstaklega áberandi í dagskrá þingsins í ár.
Kanada, Grænland og ESB opna umræðuna
Meðal fyrstu málshefjenda á aðalsviði á morgun verða Anita Anand, utanríkisráðherra Kanada, Múte B. Egede, utanríkisráðherra Grænlands, og Jozef Síkela, framkvæmdastjóri ESB á sviði alþjóðlegs samstarfs.
Í kjölfarið verður sjónum beint að aðgerðum og framtíðarsýn Bandaríkjanna á Norðurslóðum. Þar verður Mike Dunleavy, ríkisstjóri Alaska, meðal þeirra sem sitja fyrir svörum.
Á föstudag verður Kína síðan í kastljósinu þegar Fu Ying, sem hefur um árabil verið áhrifamikil í kínverskum utanríkismálum, ræðir við þátttakendur um þróun og áform Kína á alþjóðavettvangi.
Ráðherrar og stjórnarerindrekar frá Tyrklandi, Noregi, Bretlandi, Færeyjum, Eistlandi, Indlandi og Singapúr verða einnig meðal þátttakenda.
Öryggis- og varnarmál rædd
Sérstök hringborð verða haldin um öryggis- og varnarmál á Norðurslóðum og um vísindasamstarf á tímum aukinnar togstreitu milli stórveldanna.
Þær umræður fara fram samkvæmt svokölluðum Chatham House-reglum. Að öðru leyti verða málstofur og umræður á aðalsviði Arctic Circle opnar öllum þátttakendum.
Hlutverk Norðurslóða í alþjóðlegum stjórnmálum hefur farið vaxandi samhliða breytingum í samskiptum stórveldanna og auknum áhuga á náttúruauðlindum, siglingaleiðum, varnarmálum og fjárfestingum á svæðinu.
Hætta á hruni AMOC-hafstraumsins rædd
Loftslagsbreytingar, jöklar og breytingar á hafstraumum verða einnig fyrirferðarmikil á þinginu.
Johan Rockström, forstjóri Potsdam-rannsóknarstofnunarinnar í Þýskalandi, mun á föstudag fjalla um hættuna sem gæti stafað af hugsanlegu hruni AMOC-hafstraumakerfisins.
Jóhann Páll Jóhannsson umhverfisráðherra tekur þátt í þeirri umræðu.
Fjöldi annarra alþjóðlega þekktra vísindamanna og stjórnenda rannsóknarstofnana mun fjalla um breytingar á hafstraumum, jöklum og loftslagi á Norðurslóðum.
Halla Tómasdóttir ræðir þróun gervigreindar
Gervigreind verður einnig til umræðu á þinginu.
Halla Tómasdóttir forseti Íslands mun ræða við bandaríska tæknisérfræðinginn Tristan Harris um þróun gervigreindar og þær hættur sem henni kunna að fylgja.
Harris hefur undanfarin ár vakið athygli fyrir umfjöllun sína um áhrif stafrænnar tækni og gervigreindar á samfélög.
Sérstakt viðskiptaþing um fjárfestingar á Norðurslóðum
Samhliða aðalþinginu verður haldið sérstakt viðskiptaþing Arctic Circle dagana 8.–10. október.
Forstjórar fyrirtækja, banka og fjárfestingarsjóða munu þar koma saman á 12 hringborðsfundum og ræða viðskiptatækifæri og fjárfestingar á Norðurslóðum.
Sérstök áhersla verður á Grænland, Ísland, Kanada og Færeyjar.
Meðal viðfangsefna verða orkumál, uppbygging innviða, siglingar, námuvinnsla, ferðaþjónusta og sjálfbær nýting sjávarauðlinda.
Aðalþinginu lýkur á laugardagskvöld með dagskrá í boði Alaska-ríkis þar sem hljómsveitin Pamyua kemur fram og boðið verður upp á mat frá Alaska.